سپێدەهییا ئەڤرۆ نێچیرڤان بارزانی، سه‌رۆكێ هه‌رێما كوردستانێ پێشوازی ل ئێدوارد ئالگرێن، شیرەتكارێ بلندێ سه‌ربازییێ بريتانيا بۆ ڕۆژهه‌لاتا ناڤه‌ڕاست و شاندێ دگەلدا كر.
د كۆمبوونێ دا كو كۆنسولێ گشتییێ بريتانيا ل هه‌رێمێ تێدا ئامادەبوو، ڕەوشا عیراقێ و هەرێما كوردستانێ و دوماهی پێشهاتێن ڕویبڕویبوونا تیرۆرێ و كریارێن داعشێ ل عیراقێ و سووریا هاتنە گوتوبێژكرن. هه‌ردوولا د هەڤڕابوون كو داعش هێشتا گەفەكا مەزنە و ئارامییا دەڤەرێ دئێخیتە مه‌ترسييێ.
هه‌ردوولا دۆپاتی ل گرنگيیا هاريكارى و هه‌ماهه‌نگيیا پێشمه‌رگه و سوپاى عیراقێ ب پشتەڤانییا هەڤپەیمانییا نێڤده‌وله‌تییا دژى داعشێ بۆ ڕویبڕویبوونا تيرۆرستان كر، هه‌روه‌سا باس ل داهاتوویا ئه‌رکێ هەڤپەیمانییا نێڤدەولەتی ل عیراقێ و هەرێما كوردستانێ كر.
هاريكارى و په‌يوه‌ندييێن بريتانيا ل گه‌ل عیراقێ و هه‌رێما كوردستانێ، دوماهی پێشهاتێن ڕۆژهه‌لاتا ناڤه‌ڕاست و گرنگيیا پاراستنا ئێمناهییێ ل دەڤەرێ، ته‌وه‌رەكێ دی یێ كۆمبوونێ بوون.
