شرۆڤه‌كاره‌كێ سیاسى دبێژیت: ژ دروشمێ پارتى یا دیاره، كو ب تنێ ئه‌و حزبه خه‌مخورا ماف و ده‌ستكه‌ڤتێن هه‌رێما كوردستانێیه، دروشمێن لایه‌نێن دى دسه‌یرن و بێ به‌رپرسیارییا وان به‌رامبه‌ر گه‌لێ كوردستانێ دیاردكه‌ت.
دكتور سه‌ردار ئه‌ترووشى شرۆڤه‌كارێ سیاسى بۆ ئاژانسا خانى دیاركر، سه‌ربارى گرنگییا هه‌لبژارتنێن بوورى، هه‌لبژارتنێن خۆلا شه‌شێ یا په‌رله‌مانێ كوردستانێ، ژبه‌ر چه‌ند ئه‌گه‌رێن جۆدا گرنگییه‌كا تایبه‌ت هه‌یه و گرێداى چارنڤیسێ هه‌رێما كوردستانێ و قه‌واره‌یێ وێ یێ سیاسییه.
ئاشكرا ژى كر، حكومه‌تا عیراقێ به‌رده‌وام ئاریشه و ئاسته‌نگێن ئابوورى و سیاسى بۆ هه‌رێما كوردستانێ دروست دكه‌ت، پارتى دیموكراتى كوردستان، به‌رده‌وام به‌رامبه‌ر ڤان ئاسته‌نگان دڕاوه‌ستیت و به‌ره‌ڤانییێ ژ ماف و ده‌ستكه‌ڤتێن هه‌رێما كوردستانێ دكه‌ت، ئه‌ڤ چه‌نده‌یه پارتى ژ حزێن دى جۆداكرى، بوویه ئه‌گه‌ر ل هه‌موو هه‌لبژارتنان ل ڕێزا ئێكێ بهێت.
د. سه‌ردار ئه‌ترووشى ئاماژه ب هندێ ژى دا، ژ دروشمێ پارتى ( ئارامى، ئاڤه‌دانى، پێكڤه‌یى و خۆراگرى ) یا دیاره، كو دێ ل سه‌ر پێشكێشكرنا خزمه‌تێن جۆره‌وجۆر بۆ گه‌لێ كوردستانێ و مه‌زاختنا شیانان بۆ به‌ره‌ڤانیكرنێ ژ هه‌رێما كوردستانێ یا به‌رده‌وامبیت، دبه‌رامبه‌ردا حزب و لایه‌نێن دى دروشمێن سه‌یر وه‌كو ( ئێدى به‌سه، دێ ڕاگرین و دێ ب دووماهى ئینین) ڕاگه‌هاندینه، كو ڕه‌نگڤه‌دانا بێ به‌رپرسیارییا ڤان پارتایه به‌رامبه‌ر گه‌لێ كوردستانێ، پێشتر گه‌له‌ك ژ ڤان لایه‌نان هه‌ر دناڤ حكومه‌تێدا كار دكر، نوكه ب دژى وێ حكومه‌تێ د ڕاوه‌ستن.
