بەرپرسێ لقێ 18 یێ پارتییا دیموکراتا کوردستانێ دیارکر، سەرێ چەندین سالانە سنۆرێن دەڤەرا ئامێدیێ ژ ئالیێ فرۆکێن شەرکەرێن تورکیا ژبەر ھەبوونا بنگەھ و بارەگایێن گەریلایێن پارتیا کارکەرێن کوردستانێ پەکەکێ دھێنە بۆمبەبارانکرن، ھەروەسا ژبەر ھەبوونا پەکەکێ د ناڤ گوندان دا خەلکێ ھەرێما کوردستانێ بوویە قوربانی بۆمبەبارانا فروکێن تورکیا و تا نھا 30وەلاتیێن سڤیل شەھید بووینە.
عەمەر ئۆرەی بۆ خانی نیوز گۆت: گەلەک جھـ ل سنۆرێن دەڤەرا ئامێدیێ ژبەر ھەبوونا پەکەکێ بووینە جھێن سەربازی و فرۆکەیێن تورکیا بەردەوام وان دەڤەران بۆمبەباران دکەن و ژین و ژیارا خەلکی کەفتیە د ترسێ دا، قەزا ئامێدیێ ژ 348 گوندان پێکدھێت و ژ وانا 150 گوند ئاڤەدانن و 198 گوند ژی د چوولکرینە و ل ژێر کونترۆلا پەکەکێ دانە.
عەمەر ئۆرەی، بەرپرسێ لقێ 18 یێ پارتییا دیموکراتا کوردستانێ دیار ژی کر، پەکەکە دلسۆزی و خەمخۆریا خەلکێ کوردستانێ و پارتی بۆ خوە ب دەلیڤە دبینن بۆ دروستکرنا ئالۆزیان، ب چ شێوەیان نابیت خەلکێ باکور و باشوورێ کوردستانێ ژلایێ وان ڤە بێھنەگرتن، ئەو ب چ شێوەیان شەرێ پەکەکێ ناکەن و خەلکی ژی ھان نادەن شەرێ وان بکەن، لێ پێدڤییە ئەو ژی سنۆران نەبەزینن و تێبگەھن و پێداچوونێ د سیاسەتا خوە دا بکەن، نھا پەکەکە ب بەرنامە خوە نێزیکی جھێن ئاڤەدان دکەت و بۆ وان گرنگ ژی نینە خەلک بھێتە شەھیدکرن، د بەرامبەر ژی دا بۆ تورکیا خەم نینە کی بھێتە کوشتن، دڤێت بزانن خەلکێ کوردستانێ ژ ھەژی ژیانەکا خۆشترە و نابیت پەکەکە و تورکیا ھەرێمێ بکەنە مەیدانا شەر و ئالۆزیێن خوە.
ئۆرەی گۆت ژی: ئەو داخوازێ ژ پەکەکێ و سوپایێ تورکیا دکەن شەر و ململانێ یا خوە ببەنە د ناڤا گورەپانا خوەدا و ئەو وەکو ھەرێما کوردستانێ و پارتی پشتەڤان و ھاریکارن بۆ کوردێن باکور بۆ بدەستڤەئینانا مافێن وان د چوارچوڤێ تورکیا دا و بشێوەیەکێ مەدەنیانە.
خانی نیوز، ئێقبال عومەر:
