ئەڤرۆ ل دیدارا میری ل باژێرێ هەولێرێ بافڵ تاڵەبانی، ب مخابنیڤە هەر وەکی هێشتا تایا بانگەشێ نە بەردابیت د چوارچووڤەیێ نە مەنتقی و دفن بلندی و حساب نەکرن بۆ ئیرادەیا خەلکێ کوردستانێ و ئەنجامێن هەلبژارتنان و ئادابێن ئاخڤتنێ دەرفەت بۆ دروستبوو، دیسان ب چواشەکارانە و تێکدەران باخڤیت، هەرەکی وی ب خۆ ژی نە ڤەشارت کو شارەزا و مامۆستایێن تێکدانێنە.
گەلێ کوردستانێ د سەقایەکێ ئارام و ئاشتیانە دا ل 20 ئکتوبەرێ پشکداری د هەلبژارتنێن نموونەیی دا کر و جڤاکێ نێڤدەولەتی ژی ب گەرمی پێشوازی ل ئەڤان هەلبژارتنان کر، هەر چ قێری و هەوارییا بافڵ تاڵەبانی د هەلبژارتنان دا ل دەمێ بانگەشە دا داخواز دکر بجهــ نەهات، سەرەڕای کو هەلبژارتن بوو چار بازنە و کورسییێن کوتا هاتنە کێم کرن، بەلێ هەرفاندنا پارتی و دووماهی ئینان ب تارتی، کو بافڵی گەلەک ب مەزنی دکرە هەوار، ب تەمامی بەروڤاژی دەرکەڤت، کۆمسیۆن یا سەرکەڤتی بوو و هەلبژارتنەکا پاقژ و بێ ئاریشە بڕێڤەچوو و بێی ئەوان زۆمبیا ژی بڕێڤەچوو کو بافڵی باس لێ دکر، بافڵ کو خۆ ب ماتماتیکزان ل قەلەم ددەت چاڤێن وی نابینن پارتی دروست دوو جار هندی ئێکەتییێ دەنگ یێن ئیناین.
بافڵی د ئەڤێ پانێڵێ دا گەلەک ئاخڤتنێن بێسەروبەر گۆتن، کو ڕەنگڤەدانێ ژ عەقلیەتا سنووردار و نە واقعبین و خۆ سەپێنییا ویە، وی گۆتی دەڤەرا کەست ب ڕاستی یا کەسکە، ئەگە ئەڤە تاکڕەویی و خۆ سەپاندن نەبیت ئەرێ چ ناڤ لێ دهێتە دانان، بافڵ گەلەک ب ساناهی دەنگ و ڕەنگێ ب دەهان هزار دەنگدەرێن دی یێ سنوورێ سلێمانییێ ل بەرچاڤ ناگریت و چاڤێن وی ب تنێ ڕەنگێ حزبا وی دبینن، باشە ئەگەر بافڵی هندی پارتی دەنگ ئینابان دا ل پانێڵی چاوا ئاخڤیت؟!..
بافڵی د پانێلی دا پەنا بۆ هەمی جۆرێن نە ڕاستییێ برن و چیرۆکێن سەیر و سەمەڕە ژی ئینان، گۆتی ل دهۆکێ ڕێگری ل خواندنا ئەندامێن ئێکەتییێ دهێتە کرن و دوکانێن وان دهێنە هەڕفاندن، ئەو چاواشەکاری ژی بەری بۆ خەلکێ ئاسایی جهێ پێکەنینێ بیت، ل دەف ئەندامێن وان بخۆ ل دهۆکێ دێ بیتە درەوەکا ب شاخ و ڕوویێ ڕاستییێ وی دێ باشتر بۆ وان دەرکەڤیت.
هەر د گۆتنێن بافڵی دا گەفێن هندێ دکرن کو ئەو دشێت ماڵ و دوکان و نەخۆشخانەیێن ئەندامێن پارتی ل سلێمانییێ ب بلدۆزەرێ بکەتە ئەرد، چونکی ئەو ل ڕەوانگەهێ ڕەفتارێن خۆ و مافیایی بەرێخودانێ بۆ تشتان دکەت، هەر وێ چەندێ وەلێکریە ل دژی حکومەتەکا بهێز و سەروەرییا یاسایێ بیت، خەیالەک کو ب پشتڕاستیڤە ژ شکەستنێ مەزنترە چ ئەنجامەک بۆ بافڵی و تاقمێ وی نابیت.
بافڵی د پانێلی دا نە ژ دویر و نەژ نێزیک نێزیکی ئەوێ هەمی نەهامەتی و تیرۆر و بڕین و ژناڤبرنێ نەبوو، یا کو ل سنوورێ ل بن دەستهەڵاتا وی و کۆماندۆیا وی دا هەی، چ باس ل ئەوێ نانبڕین و تێکدانا ناڤخۆ یا ئێکەتییێ و دویرخستنا خەباتکارێن د ناڤ ئێکەتییێ دا نەکر، بۆ بینەران شروڤە نەکر کینە ئەوێن سنوورێ سلێمانییێ کریە سەنتەرێ بازرگانییا ماددەیێن هشبەر، ڕۆهن نەکر ئەو مافیاگەری و باچ وەرگرتن و تێکدانا ژیانا خەلکی و شۆتنا بازاڕان و جهێن کەسابەتێ و کارێ خەلکی چییە کو ل سەر دەستێ چەکدار و مافیایێن وی هاتیە کرن.
بافلێ باسێ دیانوبوونا داهاتی کر، بەلێ ئەوا دیار نینە داهاتێ سلێمانییێ یە کو وەزیرێ دارایی ژی نزانیت چەندە، ئەم ژ بافڵی پرسیار دکەین داهاتێ نەفتا قەچاغ یا کەرکووکێ کو هوین دگەل میلیشیاتان دفرۆشن چەندە؟… ئەم ژ بافڵی پرسیار دکەین هوین ب چ سیفەت دژایەتییا پڕۆژەیەکێ حکومی یێ وەک هەژمارا من دکەن، کو ژ لایێ جڤاتا وەزیرانڤە دەنگ ل سەر هاتیە دان، تە چ پۆستەکێ حکومەتێ هەیە تا بڕیارێ ل سەر پڕۆژەی و چارەنڤێسی خەلکی بدەی، بافڵی نەڤێت ببینیت ئەگەر نە بۆ خەلکێ کوردستانێ و کادرێن ئێکەتییێ ژی ڕۆهن بوویە ئەو دژایەتی و ئەو بەرهەنگاربوونا بۆ پڕۆژەیێ هەژمارا من هەی ژبەر هندێ یە بافڵ و کۆماندۆ و چەکدارێن وی ئێدی نەشێن مووچەیێ خەلکی وەکی چەکی بکاربینن بۆ کڕینا هەڤسۆسییا سیاسی، دزانن هەژمارا من دێ دووماهییێ ب نەریتێ پیس یێ ترساندن و نانبڕینێ ئینیت کو چەند سالن مافیایێن ئێکەتییێ ل دژی کادرێن خۆ بکاردئینن، سروشتیە کو بافڵ دژی هەژمارا من بیت چونکی عەقلیەتا وی یا مافیایی نەڤێت چ جاران خەلک خودان ماڵ و داهاتێ خۆ بیت.
بافڵی باس ل ئەوان بەڵگەیێن دەنگی یێن هەتکبەریا خۆ و برایێ خۆ کر، کو ل دەمێ بانگەشێ بۆ ڕایا گشتی هاتنە بەرچاڤکرن، بافڵ بخۆ باشتر ژ هەمی کەسان دزانیت کو ئەو دەنگ یێ وی و برایێ ویە، ل جهێ ئاخڤتنێن رەق، بلا ئەو وێرەکییە هەبیت بچن ژ کیژ کۆمپانیا پسپۆر و کیژ دادگەها هەیی تاقی بکەن و سکالایێ تۆمار بکەن، بەلێ ئەو بخۆ باش دزانن وان چ کەڤتن یا کری و ب ئەوان ئاخڤتنا پنی ناکەن.
ل دووماهییێ ژی دبێژین ل بەرامبەری ئەوێ تاکڕەوییێ و تێکدانێ و مافیاگەرییێ و موخەدەرات و تیرۆر و ژناڤبرن و چەواشەکاری و بزاڤکرن بۆ بنبەستنا سیاسی یا ئێکەتییا نوی یا بافڵی دڤێت ب سەر کوردستانێ دا ب سەپینیت، ستراتیژیەتا پارتی یا ڕۆهن و دیارە.
ستراتیژییا پارتی ئارامی و ئاڤەدانی و پێکڤەیی و خۆڕاگریە، ئێک هەرێم، ئێک پەرلەمان، ئێک حكومەت و ئێک هێزا پێشمەرگەیە. ئەڤە ستراتیژی و ئارمانجا هەمی تاکەکێ ئەڤی نیشتیمانییە و ئارمانجا هەمی خەباتکار و ئازادیخوازەکێ کوردستانێ یە، پارتی داکۆکیکار و تەکەزە ل سەر ئێکخستنا هێزا پێشمەرگەی دا ژ ئەڤرۆ پێڤە گڕۆپێن چەکداری ل بن سیبەرا هندەک لایەنان ب ڕەفتارا مافیایی هێرشێ ل سەر خەلکی نەکەن و سیبەرا ب سەنگ ل سەر باژێرەکیدا نە سەپینن، سەرەڕای ئەو پلانگرییێن ل دژی پارتی هاتینە کرن بۆ دیزاینەکێ پێشوەخت، زێدەترین دەنگێن دەنگدەرێن کوردستانێ ئینان و وەک مەزنترین حزب و خودان زۆرترین کورسی، دێ حکومەتێ پێکئینیت و بۆ هندێ ژی دەرگەهــ بۆ هەمی لایەنان یێ ڤەکرییە و هەر کەس و لایەنەکێ ب خەیالا ڕێگریکرن ل ئەڤان ئارمانێن پیرۆز بیت، شکەستنێن مەزنتر چاڤەڕێ دکەت، سەرکەڤتنا مەزن یا پارتی مە هان ددەت حکومەتەکا بهێز پێک بینین دا دووماهییی ب خۆ سەپاندنا ئەوان بینیت کو ل جهێ پڕۆژەیێن ئاڤاکرنێ، مژویلی دامەزراندنا کارگەهێن بەرهەمئینان و ترانزێتا ماددەیێ هشبەرن.
