شاندەكێ هەرێمێ دێ پشكدارییێ د كۆنفرانسێ ئابوورییێ ڕووسیادا كەت

پەیڤدارێ دەستەیا وەبەرهێنانێ دیاركر، ل دەستپێكا حەفتییا بهێت شاندەكێ حكومەتا هەرێما كوردستانێ ب سەرۆكایەتییا د. محەمەد شوکری، سەرۆکێ دەستەیا وەبەرهێنانێ و دگەل 20 وەبەرهێنەرێن هەرێمێ دێ سەرەدانا رووسیا كەن بۆ پشكداریكرن د كۆنفرانسێ سانپترسپۆرگدا.

بەرگەشت ئاکرەیی، پەیڤدارێ دەستەیا وەبەرهێنانێ بۆ ئاژانسا خانی ڕاگەهاند، چه‌ند وه‌لاتێن جیهانێ دێ پشكداری ڤی كۆنفرانسی بن، شاندێ هەرێمێ دێ دگەل حكومەتا سانپترسپۆرگ كۆمبیت و بەحس ل بابەتێن ئابووری، ئالوگۆرییێن بازرگانی دناڤبەرا ڕووسیا و هەرێما كوردستانێ كه‌ت و یاداشنامەیێن لێكتێگەهشتنێ دێ دناڤبەرا وەبەرهێنەرێن هەرێمێ و وەبەرهێنەرێن ڕووسی و وەبەرهێنەرێن وەلاتێن دی یێن پشكداردا ئیمزاكه‌ت.

بەرگەشت ئاکرەیی گوت، ئەڤ كۆنفرانسە دێ بۆ دەمێ چار ڕۆژان یێ بەردەوام بیت و شاندێ هەرێمێ دێ داخوازێ ژ وەبەرهێنەرێن وەلاتێن دی كه‌ت، دەرفەتێن وەبەرهێنانێ ل هەرێمێ بكەن و ل دووڤ قانوونێن وەبەرهێنانێ دێ ئاسانكارییان بۆ وان كه‌ت.

پەیڤدارێ دەستەیا وەبەرهێنانێ دیاركر، ئارمانج ژ پشكداریكرنا شاندێ هەرێمێ بۆ كۆنفرانسێ ئابوورییێ ڕووسی ئەوە ڕێژا وەبەرهێنانا ڕووسی ل كوردستانێ بهێتە زێدەكرن و پشكدارییێ د كەرتێن جودادا بكەن.