سه‌رۆكێ هه‌رێما كوردستانێ په‌یامه‌ك ب هه‌لكه‌ڤتا ڕۆژا جیهانییا نه‌هێلانا توندوتیژییا دژی ژنان به‌لاڤكر و تێدا دیاركر، ئه‌و پابه‌ندییا خۆ ب پاراستنا مافێن ژنان دووپات دكه‌ن.
نێچیرڤان بارزانی سه‌رۆكێ هه‌رێما كوردستانێ دیاركر، د ڕۆژا جیهانییا نه‌هێلانا توندوتیژییا دژی ژناندا، پابه‌ندییا خۆ ب پاراستنا مافێن ژنان ل كوردستانێ نوو دكه‌ن، پشتراستییێ د ده‌ن كو دێ ل سه‌ر كاركرنێ بۆ نه‌هێلانا هه‌موو جۆره توندوتیژییه‌كا دژی ژنان د به‌رده‌وامبن، پێشخستنا شیانێن ژنان و ب هێزكرنا پێگه‌هێ وان، به‌رێ بنیاتییێ كۆمه‌لگه‌هه‌كا دادپه‌روه‌رتر و پێشكه‌ڤتیتره.
هه‌روه‌سا ئاشكراكر، هه‌رێما كوردستانێ پیشه‌نگبوویه د پشته‌ڤانیكرنا مافێن ژناندا و دابینكرنا ده‌رفه‌تێ بۆ پشكداریكرنا وان دژیانا سیاسی و كارگێریدا ب یه‌كسانی دگه‌ل زه‌لامان، ئه‌وان باوه‌ری هه‌یه ژن نه بتنێ هه‌ڤپشكه‌كا سه‌ره‌كییه د بریاردانێدا، به‌لكو بنه‌مایه‌كه بۆ گوهۆرین و گه‌شه‌پێدانه‌كا به‌رده‌وام.
نێچیرڤان بارزانی ئاماژه ب هندێ دا، دڤێ ڕۆژێدا داخوازا هاریكارییا زێده‌تر ژ دامه‌زراوه‌یێن حكومی، ڕێكخراو، كۆمه‌لگه‌هێن مه‌ده‌نی و میدیاییدا دكه‌ن، به‌لاڤكرنا هشیارییێ و نه‌هێلانا توندوتیژییا دژی ژنان، پێدڤی ب بزاڤێن هه‌ڤپشكێن هه‌موویانه بۆ پشتراستبوون د دانانا پاشه‌رۆژه‌كا گه‌ش و ئارامدا بۆ هه‌ر تاكه‌كێ كۆمه‌لگه‌هێ.
ئاماژه ب هندێ دا، د ڤێ هه‌لكه‌ڤتێدا سوزێ د ده‌نه ژنێن كوردستانێ، بێی وه‌ستییان دێ ل سه‌ر بزاڤێن ب ده‌ستخستنا دادپه‌روه‌ری و یه‌كسانی و ب هێزكرنا شیانێن وان بۆ بجهئینانا ڕۆلێ خۆ یێ گرنگ د خزمه‌تكرن و بنیاتدانانا وه‌لاتیدا د به‌رده‌وامبن.
