سەرۆکێ حکومەتا ھەرێما کوردستانێ ئەڤرۆ رۆژا چارشەمبی د گەل کونسل و ھنارتیێن دبلۆماسیێن وەلاتان ل ھەرێما کوردستانێ کۆم بوو و رەوشا ھەرێمێ و چاکسازییێن حکومەتێ و پەیوەندیێن ھەولێرێ و بەغدایێ گۆتوبێژ کرن.
مەسروور بارزانی د کۆمبوونا خوەدا د گەل کونسل و ھنارتیێن دبلۆماسیێن وەلاتان ئاماژە ب وێ یەکێ کر، ئەوان بەردەوام کار کرییە کو باشترین پەیوەندی د گەل حکومەتا فیدرال ھەبن و ھەموو ئاریشان ب شێوەیەکێ بنەرەتی و ل سەر بنەمایێ دەستووری چارە بکەن، بۆ وێ یەکێ ژی ھەموو پێگیریێن خوە بجھئیناینە ب ئاراستەیا گەھشتن ب رێککەفتنەکێ کو د بەرژەوەندا وەلاتیێن ئیراقێ دا بیت.
مەسروور بارزانی، سەرۆکێ حکومەتا ھەرێمێ دوپات ژی کر، کو پیدڤییە پرسا مووچەی ژ ململانێن سیاسی دوور بکەڤیت و نابیت مووچە ببیتە کارتەکا فشارێ ل دژی ھەرێما کوردستانێ و وەکو سیاسەتا برسیکرنێ ل دژی فەرمانبەرێن ھەرێمێ بھێتە بکارئینان.
مەسروور بارزانی ئاماژە ب کارناما حکومەتا ھەرێمی کر بۆ ھەموجۆرکرنا ئابووری و زێدەکرنا ژێدەرێن داھاتی و کێمکرنا خەرجییان و رێکخستنا باجێ و ئاسانکارییان بۆ وەبەرھێنەرێن ناڤخوە بیانی و گۆت: پلانەک پێخەمەت دابینکرنا مووچەیێن فەرمانبەرێن ھەرێمێ دارێژتیە.
مەسروور بارزانی، سەرۆکێ حکومەتا ھەرێمێ دوپات ژی کر، ھەرێما کوردستانێ فاکتەرەکێ گرنگێ سەقامگیرییا دەڤەرێ یە و دخوازن پەیوەندیێن دۆستانە د گەل وەلاتێن جیران بتایبەتی و د گەل جڤاکا ناڤدەولەتی ب گشتی پێشڤە ببەن، ئاماژە ژی ب گرنگییا بەردەوامبوونا ھاریکاری و ھەماھەنگییا ناڤدەولەتی د گەل ھەرێما کوردستانێ بۆ بەرھەنگاربوونا گەفێن تیرۆرێ کر.
