پزیشكیان بۆ نێچیرڤان بارزانی: ئەم ب ڕاستی هەوە وەكو برایێن خۆ دبینین

سەرۆكێ هەرێما كوردستانێ ل تەهرانێ دگەل سەرۆككۆمارێ ئیرانێ كۆمبوو، نڤیسینگەها سەرۆككۆمارێ ئیرانێ ڕاگەهاند، دكۆمبوونێدا پزیشكیانی دووپاتی ل گرنگییا پێشڤەبرنا پەیوەندییێن دناڤبەرا ئیرانێ و هەرێما كوردستانێدا كر و دیاركر، ب ڕاستی ژی ئەو كوردان وەكو برایێن خۆ دبینن.
ل دووڤ ڕاگەهاندنا نڤیسنگەها سەرۆكایەتییا كۆمارا ئیرانێ، مەسعود پزیشكیان سەرۆككۆمارێ وی وەلاتی د دیدارێدا خۆشحالییا خۆ دەربارەی ئاستێ بلندێ پەیوەندییێن ئیرانێ و هەرێما كوردستانێ دەربری و دیاركر، ئەو وان وەكو برانیێن خۆ دبینن، ب دیتنا وی ب ڕێیا هاریكاری و كارلێكا هەڤپشك دشیاندایە پێنگاڤێن مەزن و كارتێكەر بەرەڤ گەشەكرن وگەشەپێدانا دەڤەرێ ب هاڤێژن.
دڕاگەهاندنێدا هاتییە، سەرۆككۆماری بەرفرەهكرنا ئالۆگۆر و هاریكاریكرن د بابەتێن سنووری، بازرگانی، ئابووری، زانستی، كولتوور و وەبەرهێنانێدا وەكو بیاڤێن گرنگێن هاریكارییا دناڤبەرا كۆمارا ئیسلامییا ئیرانێ و هەرێما كوردستانا عیراقێدا دیاركرن، دووپاتی ل ب كارئینانا ئەوان شیانان بۆ مۆكۆمكرنا پەیوەندییان كر.
هەر ل دووڤ ڕاگەهاندنێ، سەرۆكێ هەرێما كوردستانێ ئاماژە ب هاریكارییێن ئەمنی یێن دناڤبەرا هەردوو لایاندا و دیاركر، دبیاڤێ بابەتێن ئەمنیدا، هاریكاری ب باشی دهێنەكرن، ل ڤان نێزیكان كۆمبوونەك دناڤبەرا پارێزگارێن پارێزگەهێن سنوورییێن ئیرانێ و هەرێما كوردستانێدا دێ هێتەكرن، هەروەسا ڕۆلێ ئاسانكارییا ئیرانێ هاریكارە بۆ چارەسەركرنا گەلەك ئاریشەیێن سنووری.