ئاسایشا جڤاکی پشتراستکرنا خەلکییە !؟

ئاسایشا جڤاکی پشتراستکرنا خەلکییە !؟
ئیحسان ئامێدی
ژ مافێن بنەکیێن مرۆڤییە ئازاد و ئارام د ژینگەها خۆدا بژیت، هەروەکو ئەڤ هەبوونە ب سروشتێ خۆ یا ئازاد و ئارام، ژبەرکو ژیان ل وی جهی چێدبیت یا ژینگەها وێ یا سروشتی یا ئارام بیت و پێدڤییێن بنەکی یێن ژیانێ تێدا هەبن، ئەرکێ مرۆڤی یە ئاسایشا تاکان و کۆمان دابینبکەت و ئارامییێ جهگیر بکەت، ئازادیيێ ڕێکبێخیت و پێدڤیێن بنەکی یێن ژیانێ پەیدابکەت، داکو ئاسایشا جڤاکی بجهبهێت.
کوردستان وارەکێ ئارام و بخێر و بێرە، و پێکڤەژیان و هەڤگۆنجاندنەکا جڤاکی لێ هەبوویە، لەوما کورد لێ ماینە و پاراستییە، لێ دوژمن و نەیار و داگیرکەران بەڵا خۆ ژێ ڤەنەکریە و کریە مەیدانا شەر و پێکدادانان، نەهيلایە ئارام و سەقامگیر بیت و ئاسایشێ بخوڤە ببینیت.
ميژوویا ژیانا کوردستانێ خۆیاکریە کو تێرا خۆیی هەبوویە، کوردستان بەرهەمداربوویە، بەرهەمێ خۆ دهنارت و ل بەرامبەر وێ هندەك پێدڤییێن دی دئینان، دناف خۆدا ئارامییەك هەبوو لێ دوژمنان نە دهێلا ئاسایش و سەقامگیری بەر بکەڤیت، هەمیشە کوردستان د شەڕان و وێرانکرنێدابوویە، ئەگەر بۆ ماوەیەکی ژی قولاچەکا وێ ب ئازادی و ئارامییێ شاد ببیت هەر دوی دەمیدا گەف و گڤاشتن و مەترسی ل سەر هەبوویە، حنیر بوویە تا نوکە ئەڤ مللەتە د وەلاتێ خۆدا مایی، وەکو کەڤنترین مللەت ل سەر ڕوویێ ئەردی، شیابیت هەبوونا خۆ وەکو پێکهاتەکا مرۆڤی ل کوردستانێ ب پارێزیت و نە بیتە کیانەکێ سیاسی و یاسایی!؟
کورد مللەتەکێ ئاشتیخوازە و حەز ژ ئارامییێ دکەت، لێ د ناڤخودا ب ساناهی دلرەشییێ و کەرب و کینێ ڕادکەت و ناکوکییا چێدکەت و دوبەرەکییێ دروستکەت و خۆ ب ئێك و دوو نادەن و هەڤگرتنێ پێکنائینن، لەوما گوتیە: کورد قەومێ دیکلانە، هەڤرکیا هەڤ دکەن و دوژمنان ژبیردکەن!.
ڤان پيکدادان و ململانان چ بەرژەوەند تێدا نینە و لێداناهەڤگونجاندنا جڤاکییە، دکەڤیتە دخزمەتا دوژمناندا!.
یا زانایە هەريما کوردستانێ یا د ڕەوشەکا نەدلخواز دا، گەف و مەترسی ل سەر هەنە، پێکهاتێن جڤاکی ژ ئێزدییان و کریستیانان و ئەرمەنان یێن د ڕەڤن، گەنج و لاو هەست ب ئارامییێ ناکەن یێ وەلاتی بجهدهێلن و بەرەف وەلاتێن ڕۆژئاڤا دچن.
فشارێن سیاسی، ئابوری، جڤاکی، گەف، مەترسیێن داگیرکەران و تیروریستان گەفان ل سەر ئاساییشا جڤاکی دروست دکەن، ترس ل دەڤ تاکێن وەلاتی دروستبوویە، ژیان یا لێ ئالوز بووی و ئاسویێن گەش نابینیت!.
هەڤگرتن و ڕێکخستنا نافمالییا هەرێمێ و پێکڤەژیان و هەڤگۆنجاندنا سیاسی و جڤاکی کو توخمێ هێزا هەرێمێ یە و ستوینا خۆراگرییێ و بەرخودانێ یە، یا دهژیێت، ژ بەر هندێ ئەرکەکێ مرۆڤی و نەتەوەیی و نیشتیمانی و جڤاکی یێ بریاربدەستێن کوردستانێ یە ل سەر ڤێ خالێ ب ڕاوەستن و کاری بۆ بکەن و نەهێلن چ دەرز بکەڤنە نافمالا کوردستانێ دوبەرەکی و پتر ژ دوو بەرەیان چێنەبن، داکو ئەڤا هەی ژی نەکەڤیتە د مەترسیێ دا، نەمازە ميژوویا ناکوکییان و ژێکڤەبوونێ ل کوردستانێ کارەسات پاش خۆ هێلاینە.
مە هیڤی و داخاز و شەرە دگەل دوژمن و داگیرکەران، دا بەڵا خۆ ژ مە ڤەکەن و بهێلن ئەم د وەلاتێ خۆدا ب ئارامی بژین، بەلێ ل کوردستانێ ئەرکەکێ مرۆڤی و ئەخلاقی و ئایینی و نەتەوەیی یە، کار بکەن ئارامی جهگیر ببیت، جوداهییێن بیرەباوەران نە بنە ئەگەرێن ناکوکییێ و هەڤدژییێ و شەر و پێکدادانان و تێکدانا ئارامییێ.
بارێ خەلکێ کوردستانێ گەلەکێ گرانە، کاودانێن سیاسی و قەیرانێن ئابوری و دارایی خەلك شەپرزە و بێزار کریە، هیڤینە چ سەربارکێن دی ل سەرا ناکوکیێن نافخویی نەدانە سەر .
ل ڤی سەردەمی پتر ژ هەر دەمەکی خەلکێ کوردستانێ یێ پێدڤی ب ئاساییشا جڤاکییە، پێدڤی ب ئارامییێ و پشتراستییێ یە، یا کو دشێت هەستێن تاك و پێکهاتێن جڤاکی ئارام و دلنیا بکەت کو چ مەترسی ل سەر نینن و ژیانا وی یا ئەڤرۆ و سوبەهی یا مسوگەرە.
هەرێم پێدڤی ب سەپاندنا پەیرەوی و بجهئینانا یاسایێ یە، دا باوەری ب هێز بکەڤیت ئاسایش جهگیربیت، خەلکی پشتراست بیت، ژێیاتی بۆ گەل، وەلاتی و کیانێ سیاسی خۆرت ببیت.