نێچیرڤان بارزانی: ئێكەتییا زانایان ڕۆلەكێ بەرچاڤ د كویركرنا كولتوورێ پێكڤەژیانێ و ئێك و دوو قەبوولكرنێدا هەیە

سەرۆكێ هەرێما كوردستانێ پیرۆزباهی ل ئێكەتییا زانایان كر و دیاركر، ئەڤێ ئێكەتییێ ڕۆلەكێ بەرچاڤ د بەرهنگاربوون و نەهێلانا هزرا توندرەو و دەمارگێری و پێشڤەبرنا گیانێ نیشتیمانپەروەری و ئاشتییا جڤاكیدا هەیە، ئەو دێ ب هەموو شێوەیان ڕووبروو گوتارا كەربێ و هەر بزاڤەكێ بۆ تێكدانا كولتوورێ پێكڤەژیانێ بن.
نێچیرڤان بارزانی ل هەلكەڤتا 55 سالییا دامەزراندنا ئێكەتییا زانایێن ئایینێ ئیسلامی ل كوردستانێ دیاركر، ئەو ب گەرمی پیرۆزباهییێ ل سەرۆك و ئەندامێن مەكتەبا تەنفیزییا ئێكەتییا زانایێن ئایینێ ئیسلامێ ل كوردستانێ و هەموو مامۆستا و زانایێن ئایینی دكەت، هیڤییا بەردەوامییێ و سەركەڤتنێ بۆ دخوازیت.
نێچیرڤان بارزانی ڕاگەهاند، ئێكەتییا زانایان و مامۆستایێن ئایینی وەكو كا چەوا ل سەر دەمێ شۆرەشێ خەبات كریە و قۆربانی دایە، ل سەر دەمێ ئازادییێ ژیدا ئامادەیی و ڕۆلێ بەرچاڤ د كویركرنا كولتوورێ پێكڤەژیانێ و ئێك و دوو قەبوولكرنێ دا، بەرهنگاربوون و نەهێلانا هزرا توندرەوی و دەمارگیری و پێشڤەبرنا گیانێ نیشتیمانپەروەر و ئاشتییا جڤاكی هەیە.
سەرۆكێ هەرێما كوردستانێ ئاشكراكر، دڤێ هەلكەڤتێدا ئەو ب ڕێزڤە شەهیدێن ئێكەتییا زانایێن ئایینێ ئیسلامییا كوردستانێ ل بیر دئینن و سلاڤان بۆ گیانێ وان یێ پاقژ د هنێرن، هەروەسا هەموو پشتەڤانییا خۆ بۆ كارێ ئێكەتییا زانایان ژ پێخەمەت بەردەستكرنا هەموو مافێن مامۆستایێن ئایینی دووپات دكەن.
دووپات ژی كر، هەرێما كوردستانێ دێ بێی جوداهی هەردەم ب نیشتیمانێ پێكڤەژیانێ بۆ هەموو پێكهاتەیێن ئایینی و نەتەوەیی مینیت، ب هەموو شێوەیان ڕووبروو گوتارا كەربێ و هەر بزاڤەكێ بۆ تێكدانا كولتوورێ پێكڤەژیانێ بیت.