ب شیکارا سیاسی 2+2=1 و نوقتە.
بیرکاری زانستەکێ شیکارییە:
ب کورتی و کوردی وەك زانست ئەم کورد ژی دانپێدانێ دکەین، 2+2=4, ژ بۆ سەلماندنا ئەڤێ ڕاستیێ ژی، ئەگەر ئەم ئەڤێ پرسێ ئاراستەی (کۆچەر بیرکار) مەزنە زانایێ زانستێ ماتماتیکێ ل سەر ئاستێ جیهانێ و کوردێ ڕۆژهەلات بکەین، چ گۆمان نینن ل گۆرەی بەرسڤا زانستی دێ سەلماندنا وێ 2+2=4 بیت.
بیرکاری زانستەکێ دکتاتۆرە:
سەرەڕای ڕێزێن من بۆ مامۆستا و زانایێن بیرکاریێ و زانستێ بیرکاریێ، لێ د بنەکۆکا خۆ دا، زانستێ بیرکاری ئێك ژ زانستێن دکتاتور، ئەگەر نوکە بچینە د ناڤ ناڤەندێن خواندنێ دا و ب سادەیی ئەڤێ پرسیارێ ئاراستەی قوتابییان بکەین، ئەرێ تو حەز ژ بابەتێ بیرکاریێ دکەی؟، بێ گۆمان زێدەتری 70% دێ بەرسڤ نەخێر بن، چونکی بابەتێ بیرکاری ئێك ژ بابەتێن ئالۆز و دابەشکاریێ یە، لەورا ژی جاران هاوکێشەیێن بیرکاری پێدڤی ب چەندین ڕێکانە بۆ دەرخستنا ئەنجامێ ڕاستەقینە.
بیرکاری د سیاسەتێ دا شیکارەکا دییە:
ئەگەر ئەم بهێین و هاوکێشەیا بیرکاری یا (2+2) بکەینە د چوارچووڤەیەکێ سیاسی دا و ل گۆرەی دیرۆکێ ڤەخواندنێ و شیکارییێ بۆ بکەین، دێ گەلەك ب ڕۆهنی بۆ مە دیار بیت، (باکوور و باشوور+ڕۆژهەلات و ڕۆژئاڤا= کوردستانا مەزن)، ئانکو (2+2=1), سەرەڕای کو هاکان فیدان بخۆ ژی د بنەکۆکا خۆدا کوردە و باشتری هەر کەسی شیکارا ئەڤێ هاوکێشێ دزانیت، ئەڤجا ئەگەر ئەو خۆ ب بەرژەوەندخوازێ دەولەتا دکتاتور یا تورکیا دزانیت و خۆ ل پێش بەرژەوەندییا نیشتیمانی دبینیت و خۆ تێنەگەهینیت، ئەم 40 و 14 ملیۆن کوردین و ب زۆرینەیا ڕها د دیتنا مەدا 2+2=1، ئەگەر پێداگریێ ژی ل سەر دیتنا ئەنجامێ کو وی گۆتی بکەت، بلا کەرەم بکەت، ب ئامادەبوونا هەمان زانایێ کوردێ ڕۆژهەلات (کۆچەر بیرکار) و بەلگەیێن بیرکاری یێن دابەشکارییا کوردستانا مەزن کو د دیرۆکێ دا ماینە، دێ بۆ سەلمینین کو 2+2=1 و دیسان دێ بۆ سەلمینین کو جاران (0)ــڕەکا پێکهاتی ژ تەتەر و مەغولان چ بوهایێ خۆ نەبیت، ل سەر سنوورێ یونان، ب هاریکارییا (2)یەکا کو ژ فرەنسا و بریتانییا پێکهاتی دەولەتەکا دکتاتور یا تورکان دروستکریە و بووینە بەلا و علەت بۆ جیهانێ.
مەرەم ژ ئەڤێ گۆتارێ، گەلەك ب سادەی ئەوە د دیتنا هەر کوردەکێ نیشتیمان پەروەردا 2+2=1، هەر وەك نادرێ قازی ب نوونەرایەتییا گەلێ کورد گەلەك ب جوانی شیکاری بۆ چەندین هاوکێشەیان کری، کەرەمکری و گۆتی:
وا بیرمە لە مەکتبا ئەیان پرسی دوو دانە دوو ئەبێت بە چەند؟
هەموو تێکڕا ئەیان نووسی دەکاتە چوار.
هەر چەندە من ل حیسببا نمرەی کەمم دەهێنا و دەهاتمە خوار.
ئەوەش تەنیای لەبەر ئەوەی لای من وابوو دوو دانە دوو دەبێ بە یەك، نابێ بە چوار.
لای من وابوو ددان و دوو لێو و زمان نابن بە چوار، دەبن بە زار و بە تێکرای دەکەن هەوار.
دوو لاق و دوو دەستی مرۆڤ نابن بە چوار، لە لەشێك دا وا دێنە کار.
کۆچەو کۆڵان، شەقام و شار نابن بە چوار، دەبن بە شار تێیدا دەژین دەوڵەمەند و خەڵکی هەژار.
لای من وابوو کۆڵکە و ڕیشە، لق و گەڵا نابن بە چوار، دەبن بە دار، هەندێك کورت و هەندێك درێژ وەکو چنار.
لای من وابوو ئەوین و دڵ، جوانی و پاکی نابن بە چوار، دەبن بە یار لای دڵدار.
ئەم هەموو دوو بە دووانەی، دەبن بە یەك نابن بە چوار، یێجکار زۆرن، بەڵام لە کوێ وا دێنە ژمار.
تەنیا ئەوەندەی دەزانم، ئەگەر لەشم سەد پارچەکەن، بمدەنە ژێر گوللە و ڕەکبار، بچمە سەردار، قسەی دڵم دێتە سەرزار…
(کوردستان هەر وەڵاتێکە و نابێ بە چوار).
