د زانستێن سیاسیدا هەڤپەیمانی دبنە کەرستەیێن گەشەپێدانێ، لێ ئەوا ئەڤرۆ ل گۆڕەپانا سیاسی یا باشوورێ کوردستانێ دهێتە دیتن ژ تێگەهێ پڕۆژەیێ نشتیمانی دوورە و پتر بەرەڤ پۆپۆلیزمێ دچیت.
ئۆپۆرتۆنیزما سیاسی و هەڤپەیمانییا ئێكەتی و نەوەی نوێ:
ئەو نێزیکبوونە یا ل بن سیبەرا هەڤپەیمانییەکا نەراگەهاندید ناڤبەرا ئێكەتی نیشتمانی كوردستان و نەوەی نوێ دا دروست بووی، پتر ژ هندێ کو بەرنامەیەکێ ئاڤاکەر بیت بۆ حوکمڕانییێ وەكو هەڤپەیمانییەکا تەكتیكی یا دژبەر دهێتە دیتن.
ئەڤ لایەنە د هەوڵدانەکا بەردەوامدانە بۆ دروستکرنا بلۆکەکێ سیاسی کو ئارمانجا وێ یا سەرەکی ب تنێ پەکخستنا کارنامەیا حکومەتێ و لاوازکرنا پێگەهێ پارتی دیموکراتی کوردستان بیت، ئەڤ جۆرە مژویلبوونە ب ململانێیێن ناڤخۆیی کارتێکرنەکا نەرێنی ل سەر ئاسایشا نەتەوەیی دکەت .
ل بەرامبەر ڤێ مژویلبوونا ناڤخۆیی پارتی دیموکراتی کوردستان خوە د ناڤ جەرگێ ئالۆزییێن هەرێمی دا دبینیت ب تایبەت ل سەر تەوەرێ ڕۆژئاڤایێ کوردستانێ.
مژویلبوونا پارتی ب دۆزا کوردی ل سوریا و هەوڵدانێن وێ بۆ دروستکرنا هەڤسەنگییەکا سیاسی ل وێ پارچەیێ، نیشانا پابەندبوون و هەستكرن ب بەرپرسیارەتییێ یە بەرامبەر گەلێ ڕۆژئاڤا.
پارتی د وێ باوەرییێ دایە هەر لێدانەكا سیاسی یان سەربازی ل ڕۆژئاڤا دێ ئێکسەر کارتێکرنێ ل سەر سەقامگیرییا باشورێ كوردستانێ و لاوازبوونا دوزا كوردان كەت ل هەر چار پارچێن كوردستانێ، ئەڤە لایەنێ نەتەوەیی یێ پارتی نیشان ددەت کو د بەرژەوەندییێن حزبی یێن تەنگدا دەربازبوویە، بەرەڤ پاراستنا ناسنامەیا کوردی ل ئاستێ هەر چار پارچێن كوردستانێ .
پارادۆکسا نێڤدەولەتی و بەرژەوەندییێن بالا:
ئەو تەکەزییا لایەنێن دژبەر دکەن بۆ لاوازکرنا پێگەیێ پارتی د بنەڕەت دا لادانە ژ ئەرکێ ئەخلاقی و سیاسی یێ بەرامبەر پارچەیێن دی یێن کوردستانێ، د دەمەکێ دا کو ڕۆژئاڤا پێدڤی ب پشتەڤانیەیكا سیاسی و دیپلۆماسی یا ئێكگرتی هەیە .
لێ دروستکرنا بەرەیێن دژایەتییێ ل ناڤخو ب تنێ خزمەتا وان ئەجێندایان دکەن یێن کو دڤێن هەرێما کوردستانێ وەکو ئەکتەرەکێ ب هێز ل دەڤەرێ نەمینیت.
دیرۆکا سیاسی سەلماندییە کو ئەو هێزێن ل سەر بنەمایێ ژناڤبرنا یێ دی کار دکەن نەشێن پڕۆژەیەکێ نەتەوەیی یێ بەردەوام پێشکێش بکەن، مژویلبوونا پارتی ب کێشەیا کوردی ل ڕۆژئاڤا پێگەهێ وێ وەکو پارێزەرێ دۆزا کوردی دچەسپینیت د دەمەكیدا .
ب دیتنا من ئێكەتی و نەوەی نوێ ئەڤ مژویلبونا پارتی ب كێشەیا ڕۆژئاڤا ب دەرفەت دیتیە.
لێ سیاسەتا پارتی دیموكراتی كوردستان یا ل سەرخوەیە و تێدگەهێت ئەڤە ب تنێ كارتێن فشارێنە ل سەر پارتی دیموكراتی كوردستان بەرامبەر خواست و داخوازیێن وان ل سەر پێكئینانا حكومەتا هەرێما كوردستانێ و حكومەتا عێراقێ یا نوو.
ڕاگر بابیری
بەكالۆریۆس د سیاسەتا گشتیدا.
