پشکەکا میدیایێن جیهانی و وەلاتێن رۆژئاڤا، ئەمریکا تۆهمەتبار دکەن کو وێ پشت کرییە هەڤپەیمانێن خۆ یێن دێرین و پشتەڤانیا حکومەتا نووکە یا دیمەشقێ دکەت، کو زۆربەیا وان بەری نوکە چەکدارێن جیهادی بوون.
هندەک بەرپرسێن ئەمریکی، ژ وان ژی تۆم باراک ( هنارتییێ ئەمریکا بۆ سووریا) دبێژن: “هەسەدە بۆ ژناڤبرن و کۆنترۆلکرنا داعشێ هاتبوو پێکئینان، نوکە ئەرکێ وان ب دووماهی هاتییە و پێدڤییە حکومەتا سووریا ڤان بەرپرسیارەتییان هەلگریت و ئەڤ هێزە ببنە پشکەک ژ حکومەت و سووپایێ عەرەبی یێ سووری.” لێ ل لایەکێ دی، بەرپرسێن وەک لیندزی گراهام (ئەندامێ جڤاتا پیران) دژایەتیا خۆ بۆ پشتکرنە کوردان و هەسەدێ نیشان داینە.
میدیایا ئەمریکی:
ژبەر خیانەتکرنێ ل کوردان، ئیدارەیا ترەمپی و باراک رووبروو ڕەخنەیێن توند دبن” رۆژنامەیا وۆل ستریت جۆرنال یا ئەمریکی د ڕاپۆرتەکێ دا بەلاڤکریە کو ئیدارەیا ئەمریکا مژوولی گۆتوبێژکرنا ڤەکێشانا تەمام یا سەربازی یە ژ سووریا، ئەڤ یەک ژی وەک “دەستبەرداربوونەکا ئێکجاری” ژ هەسەدێ دهێتە دیتن” تۆم باراک، هنارتییێ تایبەت، ژبەر گۆتنێن خۆ کو گوتبوو “رۆلێ هەسەدێ وەک هێزەکا سەرەکی دژی داعشێ تا ڕادەیەکێ زۆر ب دووماهی هاتییە”، ڕووبروو ڕەخنەیێن گەلەک توند بوویە.
میدیایا فەڕەنسی:
رۆژئاڤا د گۆشەگیریەکا سیاسی و دبلۆماسی دایە و فڕەنسا پاشەکشێ دکەت” رۆژنامەیا لۆمۆند یا فڕەنسی د ڕاپۆرتەکێ دا بەحسێ گۆشەگیربوونا باکور و رۆژهەڵاتێ سووریا دکەت، د دەمەکێ دا وەلاتێن رۆژئاڤا چاڤێ خۆ بڕینە لرەوشا نوو یا دیمەشقێ” ل دووڤ ڕاپۆرتا ڤێ میدیایێ: “فڕەنسا و ئورووپا ژ پشتەڤانیێن خۆ یێن دبلۆماسی بۆ پڕۆژێ کوردان پاشەکشێ دکەن، کورد یێن هاتینە بجههێلان دا کو ژ پێگەهەکێ گەلەک لاواز ڤە بۆ مانا خۆ دانوستاندنان بکەن.”
میدیایا بریتانی:
وەلاتێن رۆژئاڤا کورد ل دژی داعشێ بکارئینان و نوکە پشتا خۆ ددەنێ. رۆژنامەیا ئانهێرد یا بریتانی رەخنەیێن توند ل سیاسەتا دەرڤە یا وەلاتێن رۆژئاڤا دگریت و رەوشا نوکە یا کوردان وەک “خیانەتەکا پێشبینیکری” بناڤ دکەت” د بابەتێ وان دا هاتییە کو رۆژئاڤا کورد ل دژی داعشێ بکارئینان، بەلێ دەمێ مەترسی نەمایی، پشتەڤانیێن خۆ بڕین” ئاماژە ب وێ چەندێ هاتییە کرن کو ئەڤ پشتکرنە “باوەرییێ ب رۆژئاڤا تێکددەت” و پەیامەکا مەترسیدار بۆ جیهانێ دکەت کو هەڤپەیمانی دگەل رۆژئاڤا ” ب تنێ یا دەمکی یە و چو ئاسایشەکا درێژخایەن بۆ هەڤپەیمانێن خۆ دابین ناکەت.”
میدیایا فینلەندی:
ڤەکێشانا کوردان ژ کەمپان ئەنجامێ پشتکرنا جڤاکێ نێودەولەتی یە. رۆژنامەیا Helsinki Times جەختێ ل سەر وێ بۆشاییا ئەمنی دکەت کو ژبەر ڤەکێشانا هەسەدێ ژ کەمپا “ئەلهۆل” دروست بوویی” “نەبوونا هەماهەنگی و پشتەڤانیا نێودەولەتی” ئەگەرێ سەرەکی بوو کو کورد نەچار ببن پاشەکشێ بکەن؛ ئەڤە وەک دەستبەرداربوون ژ بەرپرسیارەتیێ ژ لایێ رۆژئاڤا ڤە دهێتە دیتن، کو بۆ چەندین سالان کورد ب تنێ هێلان دا مەترسیدارترین زیندانیێن جیهانێ بڕێڤەببەن.
میدیایا سوێدی:
بێدەنگیا ئورۆپا ل هەمبەر توندوتیژیا ل دژی کوردان خیانەتە.
گۆڤارا گلۆبال بار یا سوێدی د ڕاپۆرتەکێ دا بانگەوازەکا ب لەز ئاراستەیی سەرکردەیێن ئورۆپا دکەت بۆ ڕاگرتنا توندوتیژیێ ل دژی کوردان، بێدەنگیا وان یا نوکە وەک “خیانەت ل بهایێن دیموکراسی” وەسف دکەت.
