ئەڤرۆ رۆژا ھەینی ٢٢-١-٢٠٢١ (ئیڤان جابرۆ) وەزیرا کۆچ و کۆچبەرێن ئیراقێ ل گەل (مەیان خاتوون)ێ ھەڤژینا میرێ ئێزدیێن کوردستانێ و جیھانێ، ھەروەسا ل گەل ھژمارەکا ژنێن ئێزدی و (سەردار شێخ یەحیا) دەڤەردارێ شێخان پشکداری کۆنفرانسەکێ بوون و گەنگەشە ل سەر رەوشا ژنان و ئاوارەیێن ئێزدی و دیاردەیا خۆکوشتنێ ھاتە کرن.
مەیان خاتوون بۆ خانی نیوز راگەھاند: ئەو وەکو ھەڤژینا میرێ ئیزدییان ب گرنگ زانی کۆنفرانسەکا ب ڤی رەنگی رێکبێخیت و رەوشا ژنێن ئێزدی ب گشتی و ئاوارەیێن ناڤا کەمپان ب تایبەتی گەنگەشە بکەت.
ھەڤژینا میرێ ئێزدیێن کوردستانێ و جیھانێ دیار کرژی: ئەو ل (پەرستگەھا لالش)ێ وەکو جھەکێ پیرۆز کۆمبووینە ژ بۆی کو گوھدارییا ژنێن ئێزدی بکەن، ژ بەرکو بەری نوکە دیاردەیەکا خۆ کوشتنێ ھاتە دیتن و د دوو ھەیڤان دا پێنچ مرۆڤان خۆ کوشت، ئەڤە ژی روودانەکا مەزنە و پێدڤییە بزاڤا چارەسەکرنا وێ بکەن.
ناڤھاتیێ گۆت ژی: ئەو د وێ روونشتنێ دا گەنگەشەیا چارەسەرکرنا ڤێ دیاردەیێ کرن و دێ ل دووماھیکێ ژی راسپاردە و داخوازییا کۆمبوونێ پێشکێشی وەزیرا کۆچ و کۆچبەرێن ئیراقێ و دەڤەردارییا شێخان و جھێن پەیوەندیدار کەن.
ژلایێ ئیڤان جابرو وەزیرا کۆچ کۆچبەرێن ئیراقێ ژی بۆ خانی نیوز گۆت: ئەو ھاتینە گوھدارییا کێم و کاسیێن ئێزدییان بکەن، دێ لژنەیەک ھێتە پێکئینان و دێ داخوازیێن وان ژی ل بەرچاڤ وەرگرن ژ بۆی کو ئەو ئەڤێ دیاردەیا خۆکوشتنێ دناڤ ئێزدییان دا کێم بکەین.
د کۆنفرانسێ دا گوھدارییا ژنێن چالاکڤان و رەوشەنبیر و رزگاربوویێن ئێزدی ھاتە کرن و بریارە دەرئەنجامێ وێ ژی وه‌كو پاكێجه‌كا داخوازییان بۆ لایەنێن پەیوەندیدار بھێتە رەوانەکرن.
خانی نیوز، بنەفش عەلۆ خەلەف
