بنه‌فش شێخ عه‌لۆ: دامه‌زراندنا بنگه‌هێ لالش پێدڤییه‌كا دیرۆكی بوو

سالڤەگەڕا 33ـێ یا دامەزراندنا بنگەهێ لالشێ ڕەوشەنبیری و کۆمەلایەتی پیرۆزبت، فەرە ژبیرنەکەین ئەو کەسانێن بنگەهێ لالشێ دامەزراندین و ل پێش دامەزراندنا بنگەهی ب دەهان سالان کار ژ بۆ ئارمانجا دامەزراندنا سازییەکا ئێزدییان یا ب ڤی ڕه‌نگی کریه‌ هه‌تا ل دووماهییێ بشێن بنگەهێ لالش ب دامەزرینن، لەوڕا دامەزراندنا بنگەهێ لالش و سەرهلدانا کوردستانێ ل سالا 1991ـێ ژ ئێك ناهێنه‌ جوداکرن ژبەرکو سەرهلدان ببوو ڕووناهییا چرایێ ئەڤێ خەونێ و بنگەهێ لالش هات هەبوونێ.
ئارمانجا دامەزراندنا بنگەهێ لالش نەب تنێ کۆمڤەکرنا ئێزدییان بوو، لێ هزرەکا بنگەهین بوو ژبۆ ناساندنا هزرا زەلال و پاك یا ئێزدییان ژبۆ جڤاکا ناڤخۆ و جیهانێ و پاراستنا شوناسا ڕەسەن و پەیاما زەلال، ئەو پەیاما ژ ئەزەل دا باوەری ب خۆ، مرۆڤاتی و پێکڤەژیانێ هەی و ئه‌ڤرۆ ئەو رەنج و خەباتا دامەزرێنەرێن بنگەهێ لالشێ پێشکێشی ئێزدیاتییێ کری بوویە میراتەکێ هەردەمی ژ بۆ ئێزدییان، خەبات ب مەبەست ڕەوشەنبیریکرنا خەلکی، نڤێسان ژ ئالییێ ڕه‌وشه‌نبیرانڤە، گەهاندنا پەیاما رەسەن یا ئۆلی و ڤەگێرانا قەول و بەیت و تێکستێن ئۆلی ژ ئالییێ کەساتییێ ئۆلی ڤە، ڕاستڤەکرنا ئەو نڤێسینێن خه‌له‌ت یێن لسەر ئۆلا ئێزدییان هاتینه‌ نڤێسان، هژمارەکا مەزن یا ڕەوشەنبیران قوتابییێن ئەڤێ سازییێ بوون.
لەورا دبێژم دامەزرێنەرێن بنگەهێ لالش شۆرەشەکا رەوشەنبیری د دەمەکێ زەحمەت و زێرین دا کرییە
بنگەهێ لالشێ ئەوا وه‌كری سەرۆك و سەرکردەیين وەلاتی سەرەدانا وان بکەن ژبۆ خزمەت و پشتەڤانییا ئەڤێ سازییێ.
دروشمێ بنگەهێ لالش یێ “لالش کانییەکا زەلالە دهورتە د ڕووبارێ ڕەوشەنبیرییا کوردیدا” ب خەباتا درێژ دوپاتکریە کو ڕووبارێ ئێزدیاتییێ پر کرییە ژ نڤیساندنا زانین و مەعریفەتا ئێزدیاتییێ و پێشڤەبرن و ڕەوشەنبیریکرنا جڤاکا ئێزدی و هەردەم دووپاتیکرینە ل سەر پەیاما زەلال د بەردەوام بن.
بنگەهێ لالشێ 33ـێ سالە بەردەوام خزمەتا ئەڤێ چاندا رەسەن دکەت ب هەموو ئەندام و لایەنگرێن خۆڤە کو د نوكه‌دا پشتەڤانییا ب سەدان قوتابی و ئەکادیمییێن ئێزدی کرییە، هژمارەکا مەزن یا پەرتووك، گۆڤار، ڕۆژنامە و ئالاڤێن نڤێسانێ و ڕاگەهاندنێ و کەنالەکێ تایبەتێ ڕاگەهاندنێیە، ب هەموو ئالاڤان و ب ڕێیا پرۆژەیێن پیرۆز خزمەتا ڕزگاربوویێن دەستێ داعشێ دکەت.