<h2>وەزارەتا كارەبێ ل هەرێما كوردستانێ ڕاگەهاندنەك ل دۆر دەمێ پارەدانێ و بڕینا كارەبێ د چارچووڤێ پرۆژەیێ ڕووناكی دا بەلاڤكر. ل دووڤ ڕاگەهاندنا وەزارەتێ، پێدڤییە پشكدارێن كارەبێ دماوێ 50 ڕۆژاندا بهایێ كارەبا خۆ بدەن، بەرۆڤاژی وێ ب شێوەیەكێ ئۆتۆماتیكی كارەبا وان دێ هێتە بڕین. وەزارەتێ داخواز ژ هەڤپشكێن كارەبێ كر قەرێن بەری پرۆژەیێ ڕووناكی بدەن، ژبەركو ل ڤان نێزیكان نەدانا قەرێن كەڤن ژی دێ بیتە ئەگەرێ بڕینا ئۆتۆماتیكییا كارەبێ. سەبارەت ئەگەرێن بجهئینانا ڤی سیستەمی، وەزارتا كارەبێ ڕوونكر، مەرەم ژێ دادپەروەری و پشتراتییە ژ پێدانا كارەبا 24 دەمژمێری، نەدانا پارەیێ كارەبێ ژلایێ پشكەكا هەڤپشكانڤە، بارگرانییێ دئێخیتە سەر وەزارتێ و شیانێن دابینكرنا كارەبا بەردەوام كێم دكەت. ژلایەكێ دیڤە، وەزارەت داخوازێ ژ وەلاتییان دكەت ب زووترین دەم خۆ دپرۆژەیێ ڕووناكی دا تۆماربكەن، داكو ئێكسەر ب ڕێیا كورتەنامەیێن مۆبایلێ ئاگەهداری دەركەڤتنا پسوولەیا نوو و دەمێ پارەدانێ بن. دپشكەكا دییا ڕاگەهاندنێدا هاتییە، پێدڤییە پارەدان ب ڕێیا ( ئی – پسوولی ) بیت، ژبەركو بلەزترین ڕێیە بۆ دووربوونێ ژ ڤەقەتیانا كارەبێ، ئەگەر كارەبا هەڤپشكەكی ژبەر نەدانا پارەی هاتە بڕین، پشتی ئەو هەڤپەشكە پارێ خۆ د دەت ئێكسەر دماوێ 24 دەمژمێراندا كارەب دێ بۆ وی هێتە ڤەگەراندن، دڤێت هەڤپشك تماما پارەی بدەت و پارەدانا ب نیڤی یان پشكەكا پارەی ناهێتە قەبوولكرن.</h2>
