مەسرور بارزانی پیرۆزباهی ل تۆم باراکی کر

سەرۆکێ حکومەتا هەرێما کوردستانێ، د پەیامەکێدا پیرۆزباهی ل دەستنیشانکرنا هنارتییێ سەرۆکاتییا ئەمریکا بۆ عێراق و سووریێ کر و تەكەزی ل سەر خواستێن هەولێرێ کر بۆ پێشڤەبرنا پەیوەندیێن دیرۆكی ل گەل واشنتۆن.
مەسرور بارزانی، سەرۆکێ حکومەتا هەرێما کوردستانێ، ل سەر هژمارا خۆ یا تایبەت ل تۆڕا جڤاکییا “ئێکس” پەیامەک بەلاڤکر و تێدا نڤیسیە: “پیرۆزباهییێ ل تۆم باراکی دکەم ب هەلکەفتا دەستنیشانکرنا وی وەک هنارتییێ تایبەت یێ سەرۆکاتییا ئەمریکا بۆ عێراق و سووریێ.”
مەسرور بارزانی ئاماژە ب گرنگیا هەماهەنگیا دوقۆلی دایە و ڕاگەهاندییە: “هیڤیا سەرکەفتنێ بۆ تە دخوازم د ڤی ئەرکیدا و ب جۆشڤە چاڤەرێی کارکرنا نێزیک ل گەل هەوە دکەم، ژ پێخەمەت بهێزکرنا پتر یا وێ هەڤپشکییا دیرۆكی یا د ناڤبەرا هەرێما کوردستانێ و ئەمریکا دا هەیی.”