وەزارەتا داراییی د چەند خالاندا ب ئەڤی شێوەیی بەرسڤ دا:
* چ ڕاستی بۆ وان ئاخڤتنان نینن، داهات هەیڤانە كێم و زێدە دبیت، وەزارەتێ چ ئامار بەلاڤنەكرینە كو ئاماژەیێ ب داهاتێ ناڤخۆ بكەت، هەیڤانە تەرازوویا پێداچوونێ بۆ بەغدا دهێتە هنارتن و وەزارەتا داراییا عیراقێ چ تێبینی و ڕەخنە ل سەر نینن، دڤێت ئەو پرسیارێ ژ كاك عەلی بكەن كا ئەو 400 ملیار دینارە ژ كیڤە ئیناینە؟
* دەربارەیی داهاتێ خالێن سنووری و ڕەوشا ئابووری: داهاتێ خالێن سنووری ژی وەكو داهاتێن دی بەردەوام د گوهۆرینێدایە، ل ڕابردووی هەر ژمارەكا هەبوویە، د ڕاپۆرتا تەرازوویا پێداچوونا هەیڤانەدا دیاربوویە و تیما هەڤپشك یا دیوانا چاڤدێرییا دارایییا عێراق و هەرێمێ خۆ ل گومرگ و دەرییێن سنووری ووردبینی کریە و ژمارە ل بەردەستێن وان بووینە، چ لایەنەکێ فەرمی و قانوونی چ ڕەخنە ل سەر نەبووینە، ئەم نزانین ژێدەرێ وان زانیارییێن کاك عەلی بەحس دکەت، چیە؟!.، یا ل دەڤ مە سەیرە ئەو ڕێزدارە هەتا نوکە ئاگەهداری ڕەوش و فشار و دوورپێچا ل سەر هەرێمێ نینن، وەکو بێژی ل ڤێرێ ناژین، د هەموو بیاڤێن باج، گومرگ، بیمە و هتد… کو فشارەکا ئابووری و بازرگانی یا توند ل سەر هەرێمێ دروستکریە.
زێدەباری شەڕێ ئەمریکا و ئیسرائیل دگەل ئێرانێ کو کارتێکرنا وێ گەهشتیە هەموو جیهانێ و کارتێکرنەكا ئێکسەر ل سەر عێراقێ ژی کریە، ب چ لۆژیکەکێ کارتێکرن ل سەر هەرێمێ نابیت؟.
ل دووڤ داتا و زانیارییێن وەزارەتا دارایی و ڕاپۆرتا تەرازوویا پێداچوونێ دیار دکەن، داهات ب ڕێژەیا نێزیكی 70%ێ كێ/بوویە.
* سەبارەت داهاتێ هاتنوچوونێ: داهاتێ ناڤخۆ هەر چەند بیت ڕامانا وێ ئەو نینە كو دێ هەموو چیتە گەنجینەیا گشتی، ل دووڤ قانوونێ و ڕێنمایان، وەزارەتا ناڤخۆ و چەند وەزارەتێن دی، پشكەكا وی داهاتی بۆ خۆ دبەن و پێدڤییاتییێن خۆ پێ د قەتینن، ئەوان دمینیت دبیتە داهاتێ دووماهییێ.
* داهاتێ كارەبێ هەیڤانە 90 ملیار دینار: پشكەكا ڤی پارەیی یێن قەرێ فرۆتنا كارەبێ یە ل دەڤ وەلاتی و كۆمپانییان، پشكەكا دی ژی یا تایبەتە ب كرێیا فرۆتنا كارەبێ ب وەزارەت و فەرمانگەهێن حكومی كو ب تنێ چەك و مەقاسەیە دناڤبەرا وەزارەتاندا، ئانكو ئەوا ب وەكو كاش دمینیت ب ( فعلی ) دهێتە بكارئینان و گەلەك ژ 90 ملیار دیناران كێمترە، ژبلی وێ كو پشكەكا داهاتێ كارەبێ ئێكسەر بۆ بكارئینانانا خەرجییێن چاككرنا وێستگەهان و پێگهۆر و تورێن گەهاندنا كارەبیێ دهێتە بكارئینان.
وەزارەتا دارایی ل دووماهییا بەرسڤا خۆ، داهاتێ ناڤخۆ ژ 2019ێ هەتا هەیڤا 5 یا 2026ێ ب داتا بەلاڤكر، پرسیار دكەت، بەلاڤكرنا زانیارییێن خەلەت كی ژێ مفادار دبیت؟
