زارۆک پاشەرۆژا وەلاتانە و پێدڤییە ب جوانترین شێوە بھێنە پەروەردەکرن، مامۆستایەک ژی دبێژیت: نەرەوشەنبیریا دایک و بابان ئەگەرەکێ سەرەکی یە بۆ پەروەردا نە دروست.
مامۆستا چۆمان بەرۆشکی دیارکر، رۆژ بۆ رۆژێ پەروەردەکرنا زارۆکان ژلایێ پتریا خێزانان ڤە گەلەک لاواز دبیت، پتریا وان ژی نەرەوشەنبیریا خێزانێ یە د وارێ پەروەردەکرنێ دا، ھەروەسان رەوشا ئابووری ژی کارتێکرن کریە سەر ڤێ چەندێ، دایک و باب ژی رێگریێ ل ھندەک کارێن زارۆکان ناکەن و ل دووڤ حەزا خوە ھەرتشتی بکاردئینن یان تەماشەی گەلەک زنجیران دکەن کو دگەل ژیێ وان ناگونجن، لەورا گەلەک گرنگە مامۆستا ژی رۆلێ خوە دپەروەردەکرنا زارۆکان دا ببینیت، ژبەرکو زارۆک ھەموو دەمان مامۆستای دکەنە پێشەنگ بۆ خوە.
ناھیدە دۆسکی، رێڤەبەرا باخچان ل پەرەوەدرا دھۆکێ دیارکر، ئاڤاکرنا کەسایەتیا زارۆکان تشتەکێ ب ساناھی نینە وەک دھێتە دیتن، ئەو یەک ژی ئەرکێ خێزانێ یە ژبەرکو ئەو سازییا چڤاکییە یا زارۆک تێدا دھێتە دونیایێ و شارەزایی و فێربوون و رەفتارا خوە ژ وان وەردگریت، پەروەردەکرنا زارۆکان ژی ژ خێزانەکێ بو خێزانەکێ جودایە، ھەروەسا جوداھییەکا مەزن دناڤبەرا زارۆکێ د ناڤ خێزانەکا رەوشەنبیردا بیت و زارۆکێ دناڤ خێزانەکا بەرەلادابیت ھەیە، ل نک ھندەک خێزانان ب تنێ دابینکرنا خوارنێ یە بۆ زارۆکێن وان و ھزر د وی یەکی دا ناکەن چاوا زارۆکی خوە پەروەردە بکەن کو پشت بەستنێ ل سەر خوە بکەت و بشێت کەسایەتیا خوە ئاڤاکەت، حەز و ئارەزویێن زارۆکان گەلەکن و دڤێت دایک و بابان شارەزایی ھەبیت و بزانن چ تشت دگەل وی دگونجیت، مخابنی ڤە ھندەک تشت ژی بووینە چاڤلێکرن دناڤ ھندەک خێزانان دا کو زارۆکێن خوە بەراورد دکەن دگەل ھندەک زارۆکێن دی، یان ھەتا دھەلبژارتنا یاریان دا ئەو شارەزاییە نینە کا کیش یاری دگەل ژیێ زارۆیێ وان دگونجیت، ئەڤ چەندە ژی کارتێکرنەکا نەرێنی دکەتە سەر کەسایەتیا زارۆکان.
چیمەن رەشید، ڤەکولەرا چڤاکی ل دۆر وێ یەکێ گۆت: ب رێژا ٩٠٪ێ سیستەمێ پەروردا نھا ژلایێ دایک و بابان ڤە یێ شاشە و پتریا خێزانان سیستەمەکێ رێکخستی نینە بۆ خوارن یان نڤستن یان تێکەلبوونا وان دگەل ئاریشێن مالێ، نە چاڤدێریا وان ل سەر زارۆکان و بکارئینانا مۆبایلێ و ئەنترنێتێ کارتێکرنەکا مەزن ل سەر پەروەردا زارۆکان ھەیە، ھەروەسا د خێزانا مەزن دا بتایبەتی مایتێکرن د زارۆکان دا ژ لایێ ئەندامێن خێزانێ ڤە دبیتە ئەگەرێ پەروەردەکا نەدروست، لەورا دا کو زارۆک ب باشترین شێوە بھێنە پەروەردەکرن دڤێت دایک و باب بەری زارۆکی بیننە سەر دونیایێ پێزانینێن تەمام ل سەر پەروەردەکرنا زاروکی ھەبن، گەلەک گرنکە د ناڤ میدیایێ دا گرنگیەکا مەزن ب ڤی بابەتی بھێتە دان و بەرنامێن تایبەت ھەبن و رێکخستێن مافێ زارۆکان ژی خولێن تایبەت بۆ چاوانیا پەروەردەکرنا زارۆکان ھەبن.
خانی نیوز، مەنیجا ئەیوب
