ڕۆلێ نهێنییێ نێچیرڤان بارزانی دناڤبەرا کۆچکا سپی و سوپایێ پاسداران دا

ڕۆلێ نهێنییێ نێچیرڤان بارزانی دناڤبەرا کۆچکا سپی و سوپایێ پاسداران دا
د. خێری بۆزانی

ئەوا ئیدارەیا ترەمپ، (ل گورەی ڕاپۆرتا ئەکسیۆس کو ل 16ی تەباخا 2026ێ) بەلاڤكری پەنا بۆ نێچیرڤان بارزانی بری، هەر ب تنێ بزاڤەکا بلەز نەبوو بۆ ڤەدیتنا کەسەکی دا کو پەیامەکێ دناڤبەرا دو وەلاتێن مەزن و ب هێزدا – کو هەموو دەمان نەرازین و د شەڕیدانە – بگەهینت.
ئەز وەسا دبینم ڕامانا وێ یا کوور ئەوە کو واشنتۆن، پشتی کو ناڤەندێن بریاردانێ زۆربووین ل تەهرانێ تووشی لێکتێنەگەهشتنێ بووین، پێدڤی ب کەسەکێ یان لایەنەکی هەبوو سەرمایەیەکا سیاسی یا دەگمەن د دەستێ خۆ دا هەبیت.

هویرکاریێن ڕۆژا 14ی ئایارا 2026ێ سەرنجا من ڕاکێشان؛ ئەوا بەرپرسەکێ سوپایێ پاسداران، دگەل تەلەفۆنەکا کۆدکری، گەهشتییە نڤیسینگەها سەرۆکێ هەرێمێ ل هەولێرێ و ل وێرێ پەیوەندییەکا ڕاستەوخۆ دگەل ئەحمەد وەحیدی هاتیە کرن، دیمەنەکێ بچووکە، بەلێ گەلەك ڕامانان دكێشت و ئەڤە دگەهینت کو دەمێ کەناڵێن فەرمی دگیرێن، دیپلۆماسی دچیتە ژوورێن بێدەنگڤە و ژمارا تەلەفۆنەکێ ژ بەیاننامەیەکە حکومی قورستر دبێت.

نێچیرڤان بارزانی د ڕاستی دا پرسیارا سەرەکییا واشنتۆنێ گەهاند (ئایا قالیباف و عێراقچی دەسهەلاتا دانوستاندنێ هەیە، یان بریارا دووماهییێ کەفتیە دەستێ پاسداران؟)
ئەڤ پرسیارە، بەری كو هەلویستێ ئێرانێ بۆ مە ڕوون بکەت، قەیرانا دانوستاندنێ یا واشنتۆنێ ئاشکراتر لێ دکەت. کو دەولەت قەبارەیەکێ ڕەق و ئێکپارچە نینە، دناڤ وێدا سەرۆکایەتی، حکومەت، پەرلەمان و سوپایێ پاسداران هەنە و هەر ئێك ژ وان دیتن، بەرژەوەندی و سنۆرێ دەسهەلاتا خۆ هەنە.

پشتی شەڕی و کوشتنا عەلی خامنەیی، ڕاپۆرتا ئەکسیۆس ئاماژێ ددەتە مەزنبوونا ڕۆڵێ پاسداران د ئاسایشا نەتەوەیی و سیاسەتا دەرڤە دا، ژ بەر ڤێ چەندێ، ئاریشەیا سەرەکییا واشنتۆنێ پێشنیازەكا كێم نەبوو؛ نەدزانی کی دشێت ڕێككەڤتنێ ئیمزا بکەت و ڕۆژا دووڤدا ل سەر پێیان بهێلیت.

هەلبژاردتنا بەڕێز نێچیرڤان بارزانی سەرۆکێ هەرێما کوردستانێ دشیاندایە ب چاڤێ دیپلۆماسییێ وەكو یێ یەکەیێن فیدراڵی بهێتە خواندن، هەرێما کوردستانێ هێزەکە مەزن نینە، بەلێ ل خالەکە جوگرافی و سیاسییا گەلەك هەستیار دەركەڤتییە، دناڤبەرا عێراق، ئێران و تورکیا دا، هەروەسا د ناڤ بازنەیا کاریگەرییا ئەمریکا ژی دا.

نێچیرڤان بارزانی ب خۆ ژی ژبەر زانینا زمانێ فارسی، نیاسینا تەهرانێ و پەیوەندییێن بەردەوام دگەل واشنتۆنێ، شیانێن وی یێن دیپلۆماسی پێشخستن، کو هاریکارییا وێ دکەت ژ سنۆرێن سیاسی دەربازببیت، ئەو سنۆرێن کو هەموو دەمان ل سەر نەخشەی دیار نینن.

د خواندنا خۆ یا ئێكێدا، مەیلا من ئەو بوو کو ئەڤ چیرۆکە ب تنێ وەکو دانپێدانەکێ ب پێگەهێ کەسی یێ نێچیرڤان بارزانی بخوینم، بەلێ پێشنیازا مێڤاندارییا دانوستاندنێن نهێنی ل هەولێرێ ئەز ناچارکرم ئەو لێکدانەڤە هەتا ڕادەیەكی ب گوهۆرم، کۆچکا سپی ب تنێ هنارتنێ ژ نێچیرڤان بارزانی نەدڤیا، بەلکو بزاڤ دكر هەرێمێ بکەتە سەكۆیەك بۆ كێمكرنا ئالۆزییان، نێچیرڤان بارزانی ژی بکەتە فاکتەرەکێ ب هێز یێ ناڤبەینگێرییێ، ئەڤە ب خۆ د ناڤ خۆ دا جوداهییەکە گرنگە.

ئەوا ڕوو دایی، بۆ کوردستانێ، چیرۆکەكە دیاردكەت کو نفوز تنێ ب قەبارەیێ سوپای ناپەیڤیت، شیانێن كێمكرنا لێکتێگەهشتنێ دناڤبەرا دوو نەیارێن چەکداردا هندەك جاران کاریگەرترە، دیسان، بۆ بەغدایێ ژی، نابیت ئەڤ ڕۆلە ببیتە ئەگەرێ هەستیارییا سەروەرییێ، سنۆرێن فیدرالییێ ژی نابیت ببنە دیوارەك کو ڕێ ل دەستپێشخەرییێ بگریت.

گرنگتر ژ هەموویان، پێگەهێ نێچیرڤان بارزانی ل سەر هەڤسەنگییەكا نازك دروست بوویە، نە ل سەر ڕێزا تمام یا دگەل ئێك لایەن، ئەگەر ناڤبەینکار ئەوێ دووراتییا هەڤسەنگ ژ دەست بدەت، دێ گرنگترین کارتێ خۆ ژ دەستدەت، ژ بەر ڤێ چەندێ ئەز وەسا دبینم گرنگییا ڕاستەقینە یا ڤی کەناڵێ نهێنی د هندێدا نینە كو دووماهی ب شەڕی ئینا یان نە، بەلکو گرنگییا وێ د هندێ دایە كو هەولێر دشێتل وی دەمێ كو هەموو دەرگەهـ دگرتینە، ببیتە پرە ك ل سەر نهالەكا گەلەك كوور،لێ ئەو پرێن ل دەڤەرا مە دڤێت بەردەوام بهێنە پاراستن، ب تنێ گولـلەیەك بەسە كو هەموویان ڤەگەرینتە هەردوو لایێن نهالێ.

لێ لڤێرێ ب دتنا من، بزاڤێن سەرۆك نێچیرڤان بارزانی دێ سەرگرن، ژبەركو جهێ باوەرییا هەردوو لایایە، كو باش دزانن مەرەما بارزانی و هەرێمێ بەرژەوەندییێن بەرتەنگ نینن، بەلكو نیاز و مەرەمێن وان بەرقەراربوونا ئاشتی و ئاشتەواییێ یە ل دەڤەرێ.