هەرێما کوردستانێ كاره‌كته‌ره‌كا سەرەکی یە د هەڤکێشەیێن ئه‌منی و سیاسی یێن عیراقێ و ڕۆژهەلاتا ناڤین دا، ئەڤە ژی ژ بەر هەلکەفتێ وێ یێ جوگرافی و پێگەهێ وێ یێ دەستووری و گرنگیا وێ یا ئابووری و پەیوەندیێن وێ یێن هەرێمی و نێڤدەولەتی، ئەڤ فاكته‌ره‌ بووینە ئەگەر کو هەرێما کوردستانێ ببیتە بیاڤەکێ گرنگ کو سنۆرێن خۆ یێن جوگرافی دەرباز بکەت، و ببیتە پشکەک ژ هەژمارێن ستراتیژی یێن زلهێزێن هەرێمی و نێڤدەولەتی، ژ بەر هندێ ئەو هێرشێن نوکە دهێنە سەر هەرێمێ، ب تایبەتی ب ئارمانجکرنا دامودەزگەهێن حکومی و جهێن ئەمنی و سەنتەرێن بڕیاردانێ، ناهێنە هەژمارتن وەک ب تنێ ڕووداوێن ئەمنی، بەلکو دڤێت د چوارچۆڤێ ژینگەکا هەرێمی دا بهێنە شرۆڤەکرن کو ب زێدەبوونا کێبڕکی و هەڤڕکیێ ڤە گرێدایی یە ل سەر کارتێکرنا وێ.

گرنگیا ستراتیژی یا هەرێما کوردستانێ د پلا ئێکێ دا ژ هەلکەفتا وێ یا جوگرافی دهێت، و هەبوونا سنۆرێن وێ دگەل ئیران و تورکیا، و نێزیکبوونا وێ ژ سووریا، هەڤدەم گرێدایە ب حوکمەتا فیدرالی ل بەغدا، ئەڤێ چەندێ وه‌كریه‌ کو هەرێم ببیتە خالەکا پەیوەندیێ د ناڤبەرا چەندین ژینگەهێن سیاسی و ئەمنی یێن جودا دا، هەروەسا گرنگیەکا تایبەت یا هەی ژ لایێ بازرگانی و وزە و پەیوەندیێن دەڤەرێ ڤە، ژ بلی پێگەهێ جوگرافیێ ستراتیژی، هەرێم خودان ژێدەرێن ئابووری یە، ب تایبەتی د کەرتێ وزێ دا، هەروەسا فرۆکەخانەیێن نێڤدەولەتی و ژێرخانا ئابووری و وەبەرهێنانا بیانی، لەوما سەقامگیریا هەرێمێ بۆ سەقامگیریا ئابووری یا عیراقێ و بۆ بەردەوامبوونا بزاڤا بازرگانی و وەبەرهێنانێ ل وێ دەڤەرێ گەلەک گرنگە.

گرنگیا هەرێمێ پتر ب پەیوەندیێن وێ یێن دگەل ئەمریکا و وڵاتێن ئەوروپا ڤە گرێدایە، هێزا پێشمەرگەی د شەڕێ داعشێ دا رۆلەکێ گرنگ گێڕا و هەرێما کوردستانێ ژی بوویە هەڤپشکەکێ سەرەکی د هەماهەنگیێن ئەمنی یێن نێڤدەولەتی دا ل عیراقێ، هەبوونا بەرژەوەندی و شیانێن ئەمریکا و هەڤپەیمانیا نێڤدەولەتی د چوارچۆڤێ هەرێمێ دا، وەكریه‌ کو ببیتە پشکەک ژ ژینگەکا ئەمنی کو کارتێکرنا گرژیێن نێڤبەرا زلهێزان و زلهێزێن دەڤەرێ ل سەرە، ئەڤە ژی پێگەهێ هەرێمێ و پەیوەندیێن نێڤدەولەتی د ئێک دەم دا دکەتە بیاڤەکێ ستراتیژیێ گرنگ و دەڤەرەکا بەرکەفتی یا فشاران.
پالنەرێن ب ئارمانجکرنا هەرێمێ فرەلایەنن و نه‌شێین ب تنێ ژ ئێک فاکتەری ڤە لێ بنێرین، ژ لایەکێ ڤە هەڤڕکیا ئەمریکا و ئیرانێ فاکتەرەکێ سەرەکی یە، هەڤدەم دگەل هەبوونا گرووپێن ئۆپۆزسیۆنا کوردێن ئیرانێ ل هەرێمێ، هەروەسا کێبڕکێیا هەرێمی بۆ چێکرنا کارتێکرنێ ل عیراقێ، هەروەسا ئیران هەبوونا پشکەک ژ گرووپێن کوردێن ئۆپۆزسیۆنا ئیرانێ ل هەرێما کوردستانێ وەک پرسەکا ئاساییشا نەتەوەیی دبینیت، د دەمەکێ دا پشکەک ژ هێزێن دژە ئەمریکا هەبوونا هێز و بەرژەوەندیێن ئەمریکا ل دەڤەرێ وەک ئارمانجەکێ دبینن کو دشێن د چوارچۆڤێ هەڤڕکیێن دەڤەرێ دا مفا ژێ وەربگرن، لێکنیزیکبوونا ڤان ئەگەران وه‌كریه‌ کو هەرێم روو ب ڕووی هێرشێن جودا جودا ببیتەڤە، ژ وان ژی هێرشێن فرۆکێن بێ فرۆکەڤان و مووشەکی.
بەلێ گوهۆڕینێن هەرە دیار پێکهاتینە ژ گوهۆڕینا هندەک ژ ڤان هێرشان ژ ب ئارمانجكرنا جهێن سەربازی بۆ ب ئارمانجکرنا دامەزراوەیێن حکومی و سەنتەرێن بڕیاردانێ، ب ئاوایەکێ، ب ئارمانجکرنا بارەگایەکێ حکومی یان نڤیسینگەها بەرپرسەکێ سیاسی واتایەکا جودا ژ ب ئارمانجکرنا جهەکێ سەربازی هەلدگریت، ژبه‌ر كو پەیامەکا سیاسی ل دۆر دەستهەلات و شیانا پاراستنا دامەزراوەیێن وێ دگەهینیت، هێرشکرنا سەر نڤیسینگەها مەسرور بارزانی، سەرۆکێ حکومەتا

هەرێما کوردستانێ و بارەگایەکێ ئەمنی ل هەولێرێ ل ١٧ی ته‌باخا ٢٠٢٦ێ، نموونەکا دیار یا ڤی گوهۆڕینی یە

و ژ لایێ شرۆڤەکاری ڤە، دشێین ب ئارمانجکرنا سەنتەرێن بڕیاردانێ وەک ئامرازەک بۆ فشار و راوەستاندن و نیشاندانا شیانا گەهشتنێ ب ئاستێن هەستیارێن دەستهەلاتێ تێبگەهین، ئارمانج ژ ڤان جۆرە هێرشان نە مەرجە گەهاندنا زۆرترین زیان بیت ب سەرکردایەتیێ، بەلکو پەیامەکا سیاسی یە بۆ سەرکردایەتیا سیاسی یا کوردان شیانێن پاراستنا دامەزراوەیێن خۆ نینە، ب ڤی رەنگی، هێرش دشێت ببیتە ئامرازەک بۆ کارتێکرنێ ل سەر رەفتارا سیاسی، و ببیتە پالنەرەک بۆ سەرکردایەتیێ کو دووبارە هەلسەنگاندنێ بۆ پەیوەندیێن خۆ یێن هەرێمی و نێڤدەولەتی بکەت، ژ بلی ڤێ چەندێ ژی، ب ئارمانجکرنا هەرێمێ دشێت بهێتە گرێدان ب بزاڤێن کارتێکرنێ ل سەر سروشتێ پەیوەندیێن وێ یێن دەرەکی، حوکمەتا هەرێما کوردستانێ بزاڤێ دکەت پەیوەندیێن هه‌ڤسه‌نگ دگەل ئەمریکا، تورکیا، ئیران و حوکمەتا فیدرالی بپارێزیت- سیاسەتەک کو هندەک بواران بۆ مانۆڕکرنێ ددەتێ، بەلێ د هەمان دەم دا وەلێ دکەت روو ب رووی فشارێن زلهێزێن هەڤڕک ببیتەڤە، هەر لایەنەک د وێ بزاڤێ دایە کو خاکا هەرێمێ و پەیوەندیێن وێ یێن دەرەکی نەبنە ئەگەرێ گەفێ ل سەر بەرژەوەندیێن وان، لەوما فشارێن ئەمنی دشێن ببنە ئامرازەکێ نەراستەوخۆ یێ کارتێکرنێ ل سەر هەلبژارتنێن سیاسی و ستراتیژی یێن هەرێمێ.
ل هەمبەری ڤان ئالنگارییان دا، حوکمەتا هەرێمێ دشێت پشتبەستنێ ل سەر چه‌ندین میکانیزمان بکەت بۆ پاراستنا ئاساییش و سەقامگیریا خۆ، ل پێشەنگا وێ، ب هێزکرنا شیانێن هێزێن پێشمەرگەی و خزمەتگۆزارییێن ئەمنی و بلندکرنا ئاستێ پاراستنا دامودەزگەهێن حکومەتێ و سەنتەرێن بڕیاردانێ و ژێرخان و پێشخستنا شیانێن بەرهنگاربوونا فرۆکێن بێ فرۆکەڤان و مووشەکان، سروشتێ هێرشێن ڤان دووماهیان دیار کریە کو رێکارێن ئەمنی یێن کلاسیکی نە بەسن، ئەڤێ چەندێ ژی وه‌كریه‌ کو پێشخستنا سیستەمێ ئاگەهدارکرنا پێشوەختە، بەرگریا ئاسمانی و پاراستنا ژێرخانێ پێدڤی بیت.
بەلێ ئاساییشا سەربازی ب تنێ نە چارەسەریا دووماهیێ یە، چونکی پشکەک ژ گەفێن ل سەر هەرێمێ ژ ئەگەرێن سیاسی و هەرێمی سەرچاوە دگرن، لەوما هەماهەنگی دگەل حوکمەتا فیدرالی ل بەغدا ئامرازەکێ چارەنڤیسسازە د ستراتیژیا ئەمنی دا.
هەرێما کوردستانێ پشکەکه‌ ژ عیراقێ و هەر هێرشەکا ل سەر خاکا وێ بهێتە کرن، د هەمان دەم دا هێرشە بۆ سەر خاکا عیراقێ، د ئەنجام دا، ب هێزکرنا هەڤکاریێ د ناڤبەرا بەغدا و هەولێرێ دا د بیاڤێن وەک ئاساییشا سنۆران، پاراستنا ئاسمانی، هەڤپشکیا هەوالگیری و پاراستنا ژێرخانا گرنگ، دشێت شیانێن فاكته‌رێن دەرەکی کێم بکەت بۆ بکارئینانا خاکا عیراقێ وەک گۆڕەپانەک بۆ هەڤڕکیێ.
هەروەسا لایەنێ دپلۆماسی ژی ب هەمان ئاوا گرنگە، هەرێم نەشێت ب تنێ ژ لایێ سەربازی ڤە بەرهنگاری زلهێزێن مەزن یێن دەڤەرێ ببیت، لەوما بۆ پاراستنا پەیوەندیێن سیاسی دگەل بەغدا، واشنتۆن، وه‌لاتێن ئەوروپا و دەولەتێن جیران، گەلەک گرنگه‌ سیاسەتەکا پراگماتیک بکاربینیت کو خۆ ژ ده‌ستێوه‌ردانا راستەوخۆ د هەڤڕکیێن هەرێمی دا دوور بێخیت و د هەمان دەم دا مافێ هەرێمێ و عیراقێ بۆ پاراستنا خاک و دامەزراوەیێن وان دووپات بکەت.
ل دووماهیێ دێ بێژین گرنگیا هەرێما کوردستانێ د ئێك ده‌مدا ژێدەرێ ب هێزی و ژێدەرێ لاوازیا وێ یە، هەلکەفتا جوگرافی و ژێدەرێن ئابووری و پەیوەندیێن نێڤدەولەتی و رۆلێ وێ یێ ئەمنی، بوویه‌ ئه‌گه‌ر کو ببیتە كاره‌كته‌ره‌كێ بەرچاڤ ل دەڤەرێ، بەلێ د هەمان ده‌مدا بوویه‌ ئه‌گه‌ر کو یا بەرهەڤ بیت بۆ کاردانەڤەیێن هەڤڕکیێن دەڤەرێ، هەروەسا پالنەرێن ب ئارمانجکرنا وێ، ل پال پرسا گرووپێن ئۆپۆزسیۆنا کوردێن ئیرانێ، د ناڤ بەرژەوەندی و هەژموونا ئیران، ئەمریکا، تورکیا و عیراقێ دا بەرجەستە بوویە.