رێڤەبەرێ گشتی یێ چاڤدێری و گەشەپێدانا جڤاکی ل پارێزگەھا دھۆکێ راگەھاند؛ حکومەتێ پتری ٤ ملیار دینار ل سالا بۆری ب سەر خێزانێن دھۆکێ دا بەلاڤکرینە.
شێرزاد حەمید، رێڤەبەرێ گشتی یێ چاڤدێری و گەشەپێدانا جڤاکی ل پارێزگەھا دھۆکێ د پرێس کۆنفرانسەکی دا راگەھاند؛ د سالا بۆری دا حکومەتا ھەرێما کوردستانێ ٤ ملیار ٦٥ ملیۆن و ٢٠٠ ھزار دینار ل سەر پارێزگەھا دھۆکێ بەلاڤکرینە و دگەل ١٦٥ ھزار ٩٥٠ سەلکێن ئاھێن خوارنێ بۆ وەلاتییان بەلاڤکرینە، ئەو ھاریکاری ژی ب ھەڤکارییا حکومەتێ، سەرۆکێ جڤاتا وەزیران و وەزارەتێن کاروکاروبارێن کۆمەلایەتی، پلاندانانێ و بازرگانی ب سەر خێزانێن ھەژار ھاتینە بەلاڤکرن کو ژ ھاریکاریێن دراڤی و کەلوپەلێن خوارنێ پێکدھێن.
رێڤەبەرێ گشتی یێ چاڤدێری و گەشەپێدانا جڤاکی دیارکر ژی، د. عەلی تەتەر، پارێزگەرێ دھوکێ ژی ١٤٠ ملیۆن دینار و ٢ ھزار سەلکێن خوارنێ ل سەر وەلاتییان بەلاڤکرن و ھەر سەلکەک بۆ ماوێ سێ ھەیڤان تێرا وەلاتیان دکر، ھەروەسا کۆمپانی، گروپ و بەنکا کوردستان ژی ٤٢٥ ملیۆن و ٢٠٠ ھزار دینار ھاریکاری ب رێکا وان بۆ وەلاتییان بەلاڤکرینە.
ل رێڤەبەرییا گشتی یا چاڤدێری و گەشەپێدانا جڤاکی نھا ١٣٣ زارۆک لێ دھێنە خودان کرن ژ وان ژی ٦٦ کورن و ٦٧ کچن، ھەروەسا ١٦ زەلامێن دانعەمر و ٨ ژن ل مالا دانعەمران دھێنە خودانکرن، ل دۆر خودان پێدڤیێن تایبەت ژی گۆت: ل دھۆکێ نزیکی ٢ ھزار و ٣١٥ نابینان و ھزار و ٨٢٢ نابیستان ھەنە و نزیکی ٣٥٠ زارۆکێن نەخۆشییا ئوتیزمێ ل سەنتەرێن حکومی و نە حکومی ھەنە.
ھەر ل گۆر کەیسێن جڤاکی ژی گۆت: د سالا بۆری دا ١٦٨ کەیسێن ژنان یێن ئاریشەیێن کۆمەلایەتی سەرەدانا وان کرینە ژ وان ١٤٦ کەیس ھاتینە چارەکرن، دووڤچوونا ١٨ کەیسان ژی بەردەوامە. ھەروەسا ٤٢ کەیسێن زارۆکان بوون کو ب تنێ ٤ کەیس ماینە.
