ئەندامەکێ لێژنا پەروەردە و خواندنا بلند ل پەرلەمانێ کوردستانێ ئاشکراکر، ئەو دخوازن سالەک ژ خواندنا قوتابیان نەھێتە پاشخستن و ساخلەمیا وان ژی یا پاراستی بیت، لەورا دێ چاڤەرێ کۆمبوونا بلندا بەرھنگاربوونا کۆرۆنایێ بن کو بریارە ل چەند رۆژێن بھێن ل دۆر چارەنڤیسێ خواندنا ئەڤسالە بھێتە کرن .
د. زێدان برادۆستی، ئەندامێ لێژنا پەروەردە و خواندنا بلند ل پەرلەمانێ کوردستانێ بۆ خانی نیوز راگەھاند، لێژنا پەروەردە و خواندنا بلند ل پەرلەمانێ کوردستانێ دگەل وێ چەندێ یە کو ئەڤسالە خواندنا قوتابیان ژناڤ نەچیت و د ھەمان دەم دا ساخلەمیا وان ژی یا پاراستی بیت، بریارا ڤەکرنا دەرگەھێن قوتابخانان ژی د دەست لێژنا پەروەردێ دا نینە ل پەرلەمانێ کوردستانێ و بریار دێ ژلایێ وەزارەتا ساخلەمیێ ڤە ھێتە دان.
گۆت ژی: ھەکە وەزارەتا ساخلەمیێ دیت کو رەوش یا گونجایە دەرگەھێن قوتابخانان بھێنە ڤەکرن، رۆژێن بھێن لێژنا بلندا بەرھنگاربوونا کۆرۆنایێ دێ کۆم بیت و بریارا ئێکلاکەر ل دۆر خواندنا ئەڤساڵە دەت، پێشتر دەمێ دەرگەھێن قوتابخانان ھاتیە ڤەکرن رێژا تووشبوون ب کۆرۆنایێ گەھشتە ئاستەکێ مەترسیدار و نوکە رێژە کێمبوویە، بەلێ پێدڤیە ھەر خوەپاراستن ھەبیت و ل چەند رۆژێن بھێن دێ بریار ل سەر خواندنا ئەڤسالە ھێتە دان .
ئەندامێ لێژنا پەروەردە و خواندنا بلند ل پەرلەمانێ کوردستانێ دیار ژی کر، ھەکە ئەڤجارە رێژا تووشبوون بلند بیت کونترۆلکرن ب ساناھی نابیت بتایبەت نھا کۆرۆنا نوی د رێ دایە و ھەکە خوەپاراستن نەبیت دێ مەترسیەکا مەزن ل سەر قوتابیان، ھەکە ھەتا ھەیڤا شواتێ قوتابخانە نەھاتنە ڤەکرن دێ سالەک ھێتە پاشخستن.
