جڤاتا وەزیران یا ھەرێما کوردستانێ ھەردوو وەزارەتێن ناڤخۆ و پێشمەرگەیی راسپارد: کو ھێزەکا تایبەت و ھەڤپشک پێکبینن بۆ رێکگرتنا ھەر پێشێلکارییەکێ و سەرپێچییەکێ و کارەکێ نەئاسایی ل سەرجەم خالێن سنۆریێن ھەرێما کوردستانێ و جێبەجێکرنا یاسایان و رێکاران ل ڤان خالان بێ جوداھی. ئەڤ چەندە ژی د راگەھاندنا ئەڤرۆ دا یا رۆژا پێنجشەمبی ٧-١-٢٠٢١ێ یا جڤاتا وەزیرێن ھەرێما کوردستانێ ب سەرپەرشتییا مەسرور بارزانی سەرۆکێ جڤاتا وەزیران ئاماژە پێ ھاتییەکرن، ئێک ژ وان خالان ژی راسپاردنا ھەردوو وەزارەتێن نافخۆیی و پێشمەرگەی بوو کو ھێزەکا تایبەت و ھەڤپشک دروست بکەن و وان دەستھەلاتا قانوونی یا پێدڤی ھەبیت بۆ جێبەجێکرنا یاسا و بەرھنگاربوونا قاچاخچیان و کارێن نەقانونی ل سەرجەم خالێن سنوری بێ جوداھی.
ھەر د وێ راگەھاندنێ دا ھاتییە کو ئەڤێ ھێزا ھەڤپشک دێ داکوکیێ ل جێبەجێکرنا وان بریاران کەن کو بەری نوکە ھاتبوونە دان بۆ رێکخستنا گرێبەستا خزمەتگوزاری یا خالێن سنوری و دیارکرنا داھاتی ژ بۆ بەرژەوەندییا گشتی.
