بڕیارە 104 رۆفاتێن گۆڕێن ب کۆم یێن ئێزیدیێن قوربانیێن دهستێ داعشێ، ل داویا ڤێ مەھێ ل شنگالێ بھێن ب ڤەشارتن.
رائید فەلاح حەسەن، ژ رێڤەبەرییا دەستەیا ڤەکۆلین و کۆمکرنا بەلگەیان ل دھۆکێ بۆ خانی نیوز گۆت: بریارە ل 31 ڤێ مەھێ 104 رۆفاتێن ئێزیدیێن قوربانیێن دهستێ داعشێ ل شنگالێ د مەراسیمەکێ دا بھێن ڤەشارتن کو بەریا نھا د گۆرێن ب کۆم دا ھاتینە ھلدان و پشکنینێن DNA ل بەغدا بۆ ھاتینە کرن.
رائید فەلاح حەسەن خویا ژی کر، وان ئاگاھی ھەنە کو 60 گۆڕێن دی یێن ب کۆم ل شنگالێ ماینە و تا نھا کار ل سەر نەھاتییە کرن و نههاتینه ھلدان.
ل دۆر ئامارا گۆڕێن ب کۆم ژی گۆت: 17 گۆڕێن ب کۆم ل سالا 2019 ژ ئالیێ رێڤەبەرییا وان ڤە ھاتینە ھلدان کو 235 رۆفات تێدابوون، ل مەھا 10 یا سالا 2020 ژی 3 گۆڕێن ب کۆم ھلدان کو 124 رۆفات تێدابوون، رەوشا کۆرۆنا ژی کارتێکرن ل سەر ھلدانا گۆڕان کرییە و بۆ دەمەکی ھاتبوو پاشخستن.
کۆمکرنا گۆڕان و ھلدانا رۆفاتێن وان ژ ئالیێ دەستەیا ڤەکۆلین و کۆمکرنا بەلگەیان ل دھۆکێ ب ھەماھەنگی د گەل وەزارەتا شەھید و ئەنفالکرییان ل حکومەتێن ھەرێم و ئیراقێ و ھەروەھا پزیشکییا داد ل بەغدا و رێکخستنا بێ سەروشوونان یا ناڤدەولەتی دھێت ب رێڤەبرن.
