ب تاوانا خەندقاندنا ژنەکا دووگییان، ئەڤرۆ سزایێ سێدارەدانێ ب سەر ژنەکا ئەمریکی دا ھاتە بجھـئینان.
سپێدەھییا ئەڤرۆ ب دەمێ ئەمریکا، لیسا مۆنتگەمێری یا تەمەن ٥٢ سال ل زیندانا فیدرالی ب دەرزییا ژەھراوی ھاتە سێدارەدان. ئەو ژن ب تاوانا کوشتنا ژنەکا دوگییان ھاتبوو زیندانکرن و سزایی سێدارێ ب سەر دا ھاتبوو سەپاندن، ئەڤرۆ سزایێ وێ ھاتە بجھـئینان و بو ئێکەم ژن ژلایێ حکومەتا ئەمریکا ڤە پشتی ٦٨ سالان ژ راوەستاندنێ ئەو سزا ب سەر دا بھێتە بجھئینان.
لیسا یازدەمین زیندانییە ل وێ گرتیخانێ كو سزایێ کوشتنێ ب سەر دا بھێتە بجھئینان ل دەمێ دەستھەلاتا دۆنالد ترامپی و ئیمزا ل سەر بریارا سزایێ سێدارەدانێ کری و پێش دەستھەلاتا وی بۆ دەمی ١٧ سالان کەس نە ھاتبوو سێدارەدان.
ل سالا ٢٠٠٤، لیسایێ ژنەکا ئەمریکی یا تەمەن ٢٣ سال ب ناڤێ (بۆبی جۆ ستینێت) یا دووگییان ب وەریسی خەندقاندبوو، و ب چەقۆیێ زارۆیێ وێ ژ زکێ وێ ئینابوو دەر و بزاڤکربوون بکەتە زارۆکێ خۆ. ل دادگەھێ لیسا ھاتە تومەتبارکرن ب وێ یەکێ کو ب ئەنقەست خۆ وەک نەخۆشا دەرۆنی نیشانددەت.
لیسا دووماھی ژن بوو کو ژلایێ حکومەتا ئەمریکاڤە فەرمانا کوشتنێ ب سەردا ھاتبیتەبجھئینان، بەری وێ (بۆنی براون) بوو کو ل سالا ١٩٥٣ ژ ئەگەرێ رەڤاندن و کوشتنا زارۆیەکێ تەمەن ٦ سالی ھاتبوو سێدارەدان.
