پشتی ل چەندین تۆرێن جڤاکی ھاتیە راگەھاندن کو ئەرەبستانا سعوودیێ دەست ب دانا ڤیزێ کریە بۆ چوونا عومرێ و تایبەت بۆ وەلاتێ ئیراقێ، رێڤەبەریا گشتی یا حەج و عومرێ ل کوردستانێ رۆھنکرنەک بەلاڤەکر و راگەھاند، چ بریارێن فەرمی ل سەر دەستپێکرنا گەشتێن عومرێ نە گەھشتیە وان.
ریڤەبەریا گشتی یا حەج و عومرێ ل ھەرێما کوردستانێ رۆھنکرنەک بەلاڤ کرییە و دانەیەک بۆ خانی نیوز ھنارتیە و تێدا راگەھاندیە، پشتی راوەستاندنا گەشتێن عومرێ ژ بەر پەژیکا کۆرۆنایێ ل رێکەفتی ٢٨/٢/٢٠٢٠ ھەتا نوکە چ بریارێن فەرمی ل سەر دەستپێکرنا گەشتێن عومرێ نە گەھشتیە وان، لەوما داخازێ ژ خەلکی دکەن ناڤێن خوە ل چ کۆمپانیان تۆمار نەکەن ھەتا ب فەرمی بریارەک ژ سعوودیێ ل سەر گەشتێن عومرێ بۆ خەلکێ ئیراقێ و کوردستانێ دەردکەڤیت.
ئتشکرا ژی کر، نابیت چ کۆمپانی ناڤێن خەلکی ژ نک خوە تۆمار بکەن بۆ چوونا عومرێ ھەتا بریارەک ژ رێڤەبەریا گشتی یا حەج و عومرێ نە دەرکەڤیت، بەرۆڤاژی دێ پێرابوونێن قانونی ھمبەر وان ھێنە وەرگرتن.
ژ ئالیێ خوەڤە سەرمەد جەمیل ئالیخان، رێڤەبەرێ حەج و عومرێ ل پارێزگەھا دھۆکێ بۆ خانی نیوز ئاشکراکر، سیستەمێ ڤیزا ھاتیە ڤەکرن بەلێ دەستەیا حەج و عومرێ ل سعوودیێ ب فەرمی ئیراق ئاگەھدار نەکرییە ل سەر دانا ڤیزێ بۆ خەلکێ ئیراقێ و کوردستانێ، ھەر دەمێ دەرگەھێ گەشتێن عومرێ ھاتەڤەکرن گۆمان نینە دێ ب چەندین رێنمایێن ساخلەمیێ بیت وەک خوەپاراستن ژ پەژیکا کۆرۆنایێ.
خانی نیوز، سالار محەمەد دۆسکی:
