پشتی بۆرینا ٣ ھەیڤان ل سەر نەخوشییا کاپتن و راھێنەرێ بەرێ یێ یانا دھۆک مامۆستا (نه‌عمه‌ت مه‌حموود)، نوکە ھاتییە ڤەگوھاستن بۆ نەخۆشخانەکا تایبەت ل باژێرێ سلێمانیێ
(حەمید مەحموود) برایێ مامۆستا نه‌عمەتى بۆ خانی نیوز گۆت: ب لێبۆرینڤە کو برایێ وی بۆ دەما سێ ھەیڤانە نەخۆش کەفتییە و بۆ وەرگرتنا چارەسەریێ ژی ھاتییە ڤەگوھاستن بۆ نەخۆشخانا (ئەنوەر شێخ) ل باژێرێ سلێمانیێ.
ناڤھاتی دەربارەی رەوشا وی یا سەخلەمیێ راگەھاند: تا نوکە نشتەرگەرییەک بۆ مامۆستا (نه‌عمه‌ت)ی ھاتییە کرن و نوکە ئەو ل ژێر چاڤدێرییا نوژداران دایە.
به‌رى سێ رۆژان ژى وه‌رزشڤانێ دێرین (نه‌عمه‌ت)ى د ئه‌كاونتێ خۆ یێ فه‌یسبۆكێ دا به‌لاڤكربوو كو نه‌شته‌رگه‌رییه‌ك بۆ وى هاتییه كرن و ره‌وشا به‌ره‌ڤ باشبوونێ دچیت، هه‌روه‌سا سوپاسیا هه‌موو وان كه‌س و لایه‌نان كربوو و دگه‌ل دا هاریكاربووینه.
نه‌عمەت مەحموود ل سالا ١٩٥٠یێ ل دھۆکێ ھاتیە سەر دونیایێ، ھەر د ژیێ زارۆکینیبا دا حەیزا وەرزشێ ل دەڤ پەیدابوویە و ل سالێن شێستان کو وی دەمی ھیچ یانەیه‌كا وەرزشی ل دهۆکێ نەبوون، وان پتریا چالاکیێن خۆ یێن وەرزشی ل قوتابخانەیان ئەنجام ددا، پشتی کو ل سالا ١٩٧١ یانه‌یا دھۆکێ ھاتیە دامەزرادن، مامۆستا نه‌عمەت ل گەل یانەیا خۆ بۆ یانەیا دھۆکێ ھاتە ڤەگوھاستن و ل سالا ١٩٧٢ ھەتا ١٩٧٣ وەکو راھێنەرێ وەرزشیێ یانا دھۆکێ ھاتە دەستنیشاکرن، پشتی سەرھەلدانێ ژی گەلەک جاران وەکو ھاریکارێ راھێنەرێ یانه‌یا دھۆکێ کارکریە و بۆ دەمەکی ژی ئەندامێ جڤاتا یانه‌یا دھۆکێ بوویه، بۆ دەما ١٠ سالانە ژی ھاتییە خانەنشینکرن.
خانى نیوز، چنار ئه‌حمه‌د
