کۆمسیۆنا بلندا سەربخوەیا ھەلبژارتنان ل ئیراقێ راگەھاند، ئەو بەرھەڤن ھەلبژارتنێن پێشوەخت یێن جڤاتا نوونەران ل ژڤانێ دەستنیشانکری ل رۆژا شەشی خزیرانا ئەڤسالە یان ل ھەر ژڤانەکێ دی بکەن، ب مەرجەکی ژ مەھا ئیلۆنێ دەرباز نەبیت.
کۆمسیۆنا بلندا سەربخوەیا ھەلبژارتنان ل ئیراقێ پشتی کۆمبوونا خوە د گەل ھەرسێ سەرۆکاتییێن ئیراقێ و نوونەرا نەتەوەیێن ئێکگرتی ل ئیراقێ د بەیانەکێ دا راگەھاند، سەرەرای ھەموو ئاستەنگ و رکمانییێن ساخلەمی و ئابووری یێن کارتێکرن ل کارێ وان کری، ئەو د بەرھەڤییەکا تەمام دانە کو ھەلبژارتنێن پاک و ئازاد ل گۆرەی پیڤەرێن ناڤدەولەتی ل رۆژا شەش خزیرانا ئەڤسالە بکەن، یان ل ھەر ژڤانەکێ دی بیت کو پتر دەلیڤێ بدەنە تۆمارکرنا ھەڤپەیمانیێن سیاسی و بەربژار و دەنگدەران، لێ ب مەرجەکێ ئەو ژڤان ژ مەھا ئیلۆنێ دەرباز نەبیت.
پشتی وێ کۆمبوونا بەرفرەھـ بەیاننامەیەکا ھەڤپشک ھات راگەھاندن و تێدا ھەرسێ سەرۆکاتییێن کۆماری و جڤاتا وەزیران و جڤاتا نوونەران پشتەڤانییا خوە بۆ کومسیۆنا ھەلبژارتنان دیار کر تا بەرھەڤیان بۆ ھەلبژارتنێن پێشوەخت بکەن.
