بڕیارە ئەڤرۆ جڤاتا نوونەرێن ئیراقێ کۆمبیت و بەردەوامیێ بدەتە پرۆژەقانوونا بودجەی و تا نھا ٤٠ بڕگە ھاتینە گۆتوبێژکرن.
خالیدا خەلیل، ئەنداما جڤاتا نوونەرێن ئیراقێ تایبەت بۆ خانی نیوز راگەھاند؛ جڤاتا نوونەران ئەڤرۆ دێ بەردەوامیێ دەتە زنجیرەیا کۆمبوونێن خوە ل دۆر پرۆژەقانوونا بودجەی کو تا نھا ٤٠ بڕگە ھاتینە گۆتوبێژکرن و خویا کر، ژ بەر چەندین ئەگەرێن ناڤخۆ ئاستەنگی تێدا ھەنە ب تایبەت بڕگەیێن ١٠ و ١١ یێن گرێدای پشکا کوردان کو پێدڤییە داھاتێن دەروازە و پەترۆلێ رادەستی ئیراقێ بکەت، ل دۆر وێ یەکێ ژی بەردەوام دگەل ئیراقێ د گۆتوبێژان دانە تا کو دگەھن وێ رێککەفتنێ یا د بەرژەوەندییا کوردان دابیت، لێ ئاستەنگی د زۆرن.
ھەروەسا جەمال کۆچەر، ئەندامێ لژنەیا دارایی بۆ خانی نیوز گۆت: بودجەیا پێشمەرگە ژی دێ گرێدای پشکا ھەرێمێ بیت، ل گۆر پشکا کوردان ژی گۆت: د گۆتوبێژان دا حکومەتێ پێشنیار کرییە کو ھەرێم ٢٥٠ ھزار بەرمیلان رادەستبکەت کو ئەڤە ژی وەک بوچوونا ناڤ مالا شیعەیانە و ل سەر وێ یەکێ د رژدن کو پرۆژە د دەمێ خوە یێ دیارکری دا بھێت پەسەندکرن.
