رێوره‌سمێن ده‌ست بكاربوونا سه‌روكێ نوى یێ ئه‌مریكا دێ ل واشنتۆنا پایته‌ختێ ئه‌مریكا برێڤه‌چن و مه‌راسیم بتنێ دێ سویند خارنا سه‌رۆك و جێگرێ سه‌رۆكێ ئه‌مریكا بن داكو ب فه‌رمى بایدن، وه‌ك سه‌رۆك و كامالا هارێس، وه‌ك جێگرا سه‌رۆكى ده‌ست بكار بن و سویندا یاسایى بخوون، لێ ژبه‌ر ڤایروسێ كورونایێ دێ رێوره‌سمێن ئه‌ڤ جاره د جیاواز بن.
پشتى سویند خارنێ، جۆ بایدن، ب فه‌رمى دێ بیته سه‌روكێ 46 یێ ویلایه‌تێن ئێكگرتی یێن ئه‌مریكا و دهێته پێشبینی كرن كامالا هارێس ئێكسه‌ر پشتى بایدنى سویندا یاسایى بخووت.
ل گوره‌ی یاسایێ، رێوره‌سم پێدڤیه ل 20 ى مه‌ها ئێك ل سات 7 و نیڤێ شه‌ڤێ ب ده‌مێ ئیراقێ دێ ده‌ستپێكه‌ن ( كو دبیته 11 و نیڤێ سپێدێ یێ واشنتونێ).
پشتى گرژیێن 6 ی ڤێ مه‌هێ ل ئه‌مریكا و هێرشا سه‌ر كونگرێسێ ئه‌مریكا، هێزێن ئه‌مریكا ژ بۆ پاراستنا ئێمناهیێ رێكارێن توند گرتینه به‌ر و هێزا (سیكرێت سێرڤێس) یا ئێمناهیا ناڤخویى یا ئه‌مریكا دێ سه‌رپه‌رشتیا رێكارێن ئێمناهیێ كه‌ت دگه‌ل پشكداریكرنا 15 هزار سه‌ربازێن له‌شكه‌رى و ب هزاران پۆلیسان.
ئه‌رێ دێ ترامپ ئاماده بیت؟
وه‌ك نه‌ریته‌كێ به‌رده‌وام، لده‌مێ ده‌ستبكاربوونا سه‌رۆكێ نوى یێ ئه‌مریكا، سه‌روكێ به‌رێ ئاماده‌ى رێوره‌سمان دبوو، لێ تڕامپ دێ ڤى نه‌ریتی شكێنیت، ترامپى ل 8 ى ڤێ مه‌هێ د تویته‌كێ دا نڤێسی بوو، بو وان هه‌مى كه‌سێن پسیار دكه‌ن، ئه‌ز ل 20 ی ڤێ مه‌هێ ل رێوره‌سمێن سویند خارنێ ئاماده نابم.
و ل گۆره‌ی میدیایێن وى وه‌لاتى دهێته پێشبینى كرن ترامپ به‌ره‌ف فلۆریدا بچیت و مایك پێنس، جێگرێ سه‌رۆكێ ئه‌مریكا راگه‌هاندییه كو ئه‌و دێ ئاماده‌ى رێوره‌سمێن سویند خارنێ بیت.
ل ئالییه‌كێ دی یێ رێ و ره‌سمان هونه‌رمه‌ند دێ ئاماده‌بن و سترانان بێژن
د چه‌ندین سالێن دوماهیێ دا، سه‌روكێن ئه‌مریكا هنده‌ك هونه‌رمه‌ند ئاماده‌ى رێوره‌سمان كرینه داكو سترانان بێژن، ل رێوره‌سمێن ده‌ست بكاربوونا ئۆباماى ئارثێرا فرانكلین و هو‌نه‌رمه‌ندان به‌رنیاس بیونسێ ستران ل وان رێوره‌سمان گۆتینه، سه‌ره‌ڕاى ڤایرۆسێ كۆرۆنا، ئه‌ڤ ساله ژى دێ ستران هێنه گوتن و سرودا نشتیمانى یا ئه‌مریكا دێ ژلایێ له‌یدى گاگا ڤه هێته گۆتن دگه‌ل ئاماده‌بوونا جێنێفر لۆپێز.
خانی نیوز، هیدار بادی
