(کەمال موسلم) وەزیرێ بازرگانی و پیشەسازیێ حکومەتا ھەرێما کوردستانێ، ئەڤرۆ چوارشەمبی راگەھاند: کۆمبوونا وان دگەل وەزیرێ بازرگانیێ ئیراقێ بۆ مەرەما چارەسەرکرنا ئاریشێن بوارێ پیشەسازی بوویە و وان لژنەکا ھەڤپشک ژی بۆ چارەسەرکرنا ئاریشان پێکئینایە.
د پرێس کۆنفرانسەکیدا کەمال موسلم، وەزیرێ بازرگانی و پیشەسازیێ حکومەتا ھەرێما کوردستانێ گۆت: ئەڤ کۆمبوونە وەک خولا ئێکێ ل ھەڤلێرێ ب رێڤە دچیت و پاشی ل بەغدا دێ کۆمبوونەکا دی ب رێڤەبەن، ھەروەسا بۆ چارەسەرکرنا ئاریشەیێن پیشەسازیێن ناڤبەرا ھەڤلێر و بەغدایێ ژی دێ لژنەکێ پێکئینن، بۆ ڤێ مەرەمێ ژی لژنە دێ ھەر ٦٠ رۆژان جارەکێ راپۆرتەکێ بۆ ھەردوو وەزارەتێن پیشەسازی و بازرگانی یا حکومەتا ھەرێما کوردستانێ و ئیراقێ ھنێریت.
کەمال موسلمی ئاماژە ب ھندێ ژی کر کو گرەنتی ھەیە بۆ دانوستاندنێ ل سەر ھەموو ئاریشان، ب تایبەت گرنگیدان ب بەرھەمێن پیشەسازیێن دناڤبەرا ھەرێما کوردستانێ و باژێرێن دی یێن ئیراقێ، ھەروەسا رێکخستنا باجان ژی.
د ڤی بواری دا (مەنھەل خەباز) وەزیرێ بازرگانی و پیشەسازیێ ئیراقێ راگەھاند، مە دڤێت مفای ژ ئەزموونا ھەرێما کوردستانێ وەربگرین و دێ یاداشتا لێکتێگەھشتنێ دناڤبەرا وەزارەتا بازرگانییا حکومەتا ھەرێما کوردستانێ و وەزارەتا بازرگانیا ئیراقێ ھێتە ئیمزاکرن. بۆ ڤێ مەرەمێ ژی حەفتیا داھاتی کومبوونەکا بەرفرەھـ دناڤبەرا ھەردوو وەزارەتێن پیشەسازیێ دێ ل بەغدا ب رێڤە چیت.
وەزیرێ پیشەسازیێ ئیراقێ بەحسێ وێ چەندێ ژی کر، کو ل سەرانسەری ئیراقێ ئاریشا تۆمارکرنا کۆمپانییان ھەیە و ل سەر وی بابەتی ژی ئەم گەھشتینە رێکەکێ بۆ چارەسەرکرنا ئاریشان و کۆمەکا ئاریشێن دی ژی ھەنە کو دڤێت ل سەر ھەموویان دانوستاندنێ بکەین.
