حكوومەتا هەرێما كوردستانێ: به‌رهه‌ڤین بۆ چاره‌سه‌ركرنا بریندارێن په‌قینێن به‌غدایێ

وه‌زیرێ ساخله‌مییا حكوومه‌تا هه‌رێما كوردستانێ ئه‌ڤرۆ ئێڤارى راگه‌هاند كو ل سه‌ر راسپارده‌یا مه‌سرۆر بارزانى سه‌رۆكێ حكوومه‌تا هه‌رێما كوردستانێ، په‌یوه‌ندى ب وه‌زیرێ ساخله‌میێ و ژینگه‌ها ئیراقێ كرییه‌، دیاركرییه‌ كو ئه‌م د ئاماده‌ینه‌ بۆ مه‌ره‌ما چاره‌سه‌رییا بریندارێن په‌قینا ئه‌ڤرۆ یا به‌غدایێ.

دكتۆر سامان به‌رزنجى وه‌زیرێ ساخله‌میێ د هژمارا خۆ یا تورا جڤاكییا فه‌یسبۆكى به‌لاڤكرییه‌: ل سه‌ر راسپارده‌یا مه‌سرور بارزانى سه‌رۆكێ حكوومه‌تا هه‌رێما كوردستانێ، نه‌خۆشخانێن هه‌رێما كوردستانێ راسپاردینه‌ و د ئاماده‌نه‌ بۆ پێشوازی و چاره‌سه‌ركرنا بریندارێن په‌قینا ئه‌ڤرۆ ل به‌غدا.

وه‌زیرێ ساخله‌میێ د په‌یوه‌ندییه‌كا ته‌له‌فونى دا د گه‌ل دكتۆر حه‌سه‌ن ته‌میمى وه‌زیرێ ساخله‌مى و ژینگه‌ها ئیراقا فیدرال، ئه‌و ئاگه‌هدار كرییه‌ كو ل سه‌ر راسپارده‌یا سه‌رۆكێ حكوومه‌تا هه‌رێما كوردستانێ ئه‌و ئاماده‌نه‌ بۆ هه‌ر هاریكارییه‌كا پێدڤى و هه‌موو نه‌خۆشخانه‌ ژى د ئاماده‌نه‌ بۆ پێشوازیكرنا برینداران و چاره‌سه‌ركرنا وان.

وه‌زیرێ ساخله‌می و ژینگه‌ها ئیراقێ سوپاسیا خۆ بۆ سه‌رۆكێ حكوومه‌تا هه‌رێما كوردستانێ ده‌ربرى و ئه‌ڤ هه‌لویسته‌ ب گرنگ و مرۆڤدۆستانه‌ وه‌سفكر.