سه‌رۆكاتییا هه‌رێما كوردستانێ په‌قینێن به‌غدایێ شه‌رمزار دكه‌ت

سه‌رۆكاتییا هه‌رێما كوردستانێ د به‌یاننامه‌یه‌كێ دا په‌قینا ئه‌ڤرۆ یا به‌غدایێ شه‌مزاركر و راگه‌هاند: ئه‌و ب توندى هێرشا تیرۆرستییا خۆكوژى ل به‌غدایێ شه‌رمزار دكه‌ن كو ب شێویه‌كێ درندانه‌ وه‌لاتی كریینه‌ ئارمانج‌ و هژماره‌كا زۆر یا شه‌هید و برینداران ل دووڤ خۆ هێلاینه‌.

سه‌رۆكاتیێ گۆتییه‌ ژى: ئه‌و سه‌ره‌خۆشیێ ل مالباتێن قوربانییان دكه‌ن و هه‌ڤسۆز و هه‌ڤخه‌مێن وانن، هه‌روه‌سا هیڤییا سلامه‌تى و چاكبوونێ بۆ برینداران دخوازن.

سه‌رۆكاتییا هه‌رێمێ به‌رهه‌ڤییا خۆ بۆ هاریكارییان نیشاندایه‌ و راگه‌هاندییه‌: هه‌رێما كوردستانێ ب هه‌موو شێویه‌كێ به‌رهه‌ڤه‌ د نه‌خۆشخانه‌یێن خۆ دا پێشوازیێ ل بریندار و به‌ركه‌فتیێن وان هێرشان بكه‌ت و خزمه‌تگۆزاریێن نوژدارى پێشكێشی وان بكه‌ت.

ل دووماهییا به‌یاننامێ دا، سه‌رۆكاتییا هه‌رێما كوردستانێ دوپاتكرییه‌: ئه‌ڤان هێرشێن تیرۆرستى نیشانده‌رێ مه‌ترسیێن تیرۆرێنه‌ و ئالیێن په‌یوه‌ندیدار و هه‌موو هێزێن سیاسی یێن وه‌لاى دێ ئێخنه‌ هه‌مبه‌ر به‌رپرسیارییا نشتیمانى بۆ ئێكرێزى و هه‌ڤپشكى و پێكڤه‌ كاركرنێ ب مه‌ره‌ما به‌رهنگاربوونا ته‌حه‌دییان و ده‌ربازكرنا وه‌لاتى ژ مه‌ترسی و ئالۆزی و ئاریشه‌ و قه‌یرانان.