ئێڤارا ئه‌ڤرۆ پێنجشه‌مبى مسته‌فا كازمى سه‌رۆك وه‌زیرێن ئیراقێ بریارا ئه‌نجامدانا گهۆرانكاریان ل ده‌زگه‌هێن ئاسایشا وه‌لاتى دا و هژماره‌كا به‌رپرسێن وى ده‌زگه‌هین ژ كارێ وان لادا، ئه‌ڤ چه‌نده ژى ژبه‌ر وان هه‌ردوو ته‌قینێن خوێناویێن به‌رى نیڤرۆ یا ئه‌ڤرۆ به‌غدا هه‌ژاندى.
میدیایێن ئیراقێ به‌لاڤكرییه مسته‌فا كازمى وه‌ك فه‌رمانده‌یێ گشتییێ هێزێن چه‌كداریێن ئیراقێ بریار دایه گۆرانكاریێن بنچینه‌ى ل ده‌زگه‌هێن ئاسایشێ بكه‌ت و هژماره‌كا به‌رپرسان دویر بێخیت.
به‌رى نیڤرۆ یا ئه‌ڤرۆ پێنجشه‌مبى دوو خۆكوژێن ئێك ل دووڤ ئێك ل مه‌یدانا ته‌یه‌ران ل ده‌ڤه‌را بابولشه‌رقى ل به‌غدا خۆ په‌قاندن.
ل دووڤ ئامارێن نه‌فه‌رمى، ئه‌و هه‌ردوو په‌قین بوونه ئه‌گه‌رێ كۆشتنا 28 كه‌سان و برینداربوونا 73ێ كه‌سێن دى.
