حەفتێ و پێنج سال ب سەر دامەزراندنا کۆمارا کوردستان ل مھابادێ دەرباز بوون یا ل رۆژا 21ى کانوونا دویێ ل سالا 1946 ێ ل سەر بنەمایێ کۆمەلا ژێکاف و ژ ئالیێ حزبا دیمۆکراتا کوردستانێ و ب سەرکردایەتییا پیشەوا قازی محەمەد و ب پشکدارییا بارزانییان ھاتیە دامەزاندن، حەفتێ و پێنج سال دەرباز بوون و تا نھا رێک و رێبازا ئارمانجێن کۆمارا کوردستانێ بەردەوامن.
کۆمارا کوردستان دەولەتەکا بێ دانپێدان، سروودا وێ یا نشتیمانی ئەی رەقیب بوو و پایتەختێ وێ باژارێ مھاباد و زمانێ فەرمی کوردی بوو، ھەروەسا سیستەمێ حوکمرانیێ سیستەمێ کۆماری بوو و سەرۆککۆمارێ وێ پێشەوا قازی محەمەد بوو و سەرۆکوەزیران حاجی بابەشێخ بوو.
کۆمارا کوردستان ب کۆمارا ئێکێ یا کوردی دھێتە نیاسین و بەری حەفتێ و پێنج سالان ل باژارێ مھابادێ ل رۆژھەلاتێ کوردستانێ ھاتە دامەزراندن، کۆمارەکا کوردی یا عەمر کورت بوو، رۆژا 21ى کانوونا دویێ یا سالا 1946ێ ب سەرکردایەتییا پێشەوا قازی محەمەد ھات دامەزراندن و نوونەرێن پارچێن دیێن کوردستانێ ژی تێدا ھەبوون، رۆلێ کارا یێ بارزانییان ژی ب رێبەرییا نەمر مەلا مستەفا بارزانی ناھێت ژبیرکرن.
کابینا حکومەتا کۆمارا مھاباد:
حاجی بابەشێخ، سەرۆکوەزیران.
وەزیرێ جەنگێ: سەیفی قازی.
وەزیرێ کیشوەر: محەمەد ئەمین موعینی.
وەزیرێ ئابووری: ئەحمەد ئیلاھی وەزیری.
پۆست و تەلەگراف: کەریم ئەحمەدیان.
وەزیرێ فەرھەنگ، مەناف کەریمی.
وەزیرێ تەبلیغات: سەدیق حەیدەری.
وەزیرێ کار: خەلیل خوسرەوی.
وەزیرێ بازرگانی: حاجی مستەفا داوودی.
وەزیرێ چاندنێ: مەحموود وەلی زادە.
وەزیرێ رێک و بانان: ئسماعیل ئیلخانی زادە.
وەزیرێ ساخلەمی: سەید محەمەد ئەیوبییان.
وەزیرێ مەشاویر، عەبدولرحەمان ئیلخانی زادە.
وەزیرێ داد: مەلا حسێن مەجدی.
