ئەڤرۆ پێنجشەمبی حەسەن تەمیمی وەزیرێ ساخلەمی و ژینگەھا ئیراقێ راگەھاند: وەلاتێ وی ل دووماھیکا ھەیڤا ئادارێ دا نێزیکی ئێک ملیۆن و ٥٠٠ ھزار قورچێن ڤاکسینێ ڤایزەری دژی کۆرۆنایێ دێ ب دەست خۆڤە ئێخیت.
تەمیمی د راگەھاندنەکێ دا ئاماژە ب ھندێ کرییە کو ئەڤە ئێکەم پشکە ژ ڤاکسینێ کۆرۆنایێ و ل دووماھیکا ھەیڤا ئادارا داھاتی دێ ب دەستڤە ھێت.
وەزیرێ ساخلەمی و ژینگەھا ئیراقێ گۆت ژی، ئەڤ پشکا ڤاکسینی ل دەستپێکێ دێ ب کەسانێن ھەژی ھێتە دان، ب خۆشحالیڤە نوکە ئیراق ژ لایێ کێمبوونا رێژا مرنێ ب ئەگەرێ ڤایرۆسێ ڤایرۆسێ کۆرۆنایێ د رەوشەکا باش دایە.
ھەژی گۆتنێ یە کو رۆژا سێشەمبییا بۆری جڤاتا وەزیرێن ئیراقێ ب سەرۆکایەتییا مستەفا کازمی کۆمبوو و ھژمارەکا بریاران دەرکرن و ئێک ژ بریارێن جڤاتا وەزیرێن ئیراقێ، دیارکرنا ١٠٠ ملیۆن دۆلاران بوو بۆ کرینا پێکوتا دژی پەژیکا ڤایرۆسێ کۆرۆنایێ.
