ئەڤرۆ سپێدێ وەلاتیێن تاخێ کێڤلا ا دهۆكێ خرڤەبونەکا نەرازیبوونێ ل بەرامبەر کۆمپانییەکا ئاكنجیبوونێ ئەنجامدا کو دێ رابیت ب دروستکرنا یەکەیێن نیشتەجێبوونێ ل سەر ئەردێن وان وەلاتیان.
وەلاتیەکێ ب ناڤێ خالد باپیر عبداللە بو خانی نیوز دیارکر: کو ئەو ئێک بوویە ژ بەرپرسێن ئیمزاكرنا ڤێ گرێبەستێ کو بەریا یازدە سالا وان گرێبەست دگەل حەفت کۆمپانیێن ئاكنجیبوونێ گرێدابوو ب رەزامەندیا هەردوو لایەنا و باژێرڤانییا دهۆكێ کو ئەڤ کۆمپانییە ل سەر ئەردێن وان یەکەیێن ئاكنجیبوونێ ئاڤا بکەن، ل هەمبەری ڤێ چەندێ کو دێ هەر ئێک ژ وان وەلاتییان چار پارچە و نیڤ ئەرد و یەکەیەکا ئاكنجیبوونێ ژ وان كۆمپانییان وهرگرن.
ناڤبری گۆت: دنۆکەدا دوو ژ وان کۆمپانییان کار ل سەر ڤان یەکەیێن ئاكنجیبوونێ دکەن کو یەک ژ وان پێگیرە ب گرێبەستێ و یەکژی دبێژیت کو ئەو پێگیرنینە ب وێ گرێبەستا بەریا ۱۱ سالان دگەل وان وەلاتیان گرێدای.
ولاتیێن وی تاخی دبێژن کو ژمارا وان ٦٥ جۆتیارن و تیروپشک بۆ وان هاتیە کێشان و بەلاڤکرینە ل سەر وان حەفت کۆمپانییان کو پارچەیێن ئەردی و یەکەیێن ئاكنجیبوونێ ب وان بهێنە دان ژلایێ کۆمپانییانڤە.
هەر ژبوی ڤێ مەرەمێ خانی نیوز پەیوەندی ب (لهزگین گیزی) خودانێ ئێك ژ وان کومپانیایێ کر: وی وەسا دیارکرن کو بەریا چەند سالا حکومەتێ ئەڤ جۆتیارە هەمی قەرەبوکرینە و ئەو گرێبەستێن کو وەلاتی دبێژن هەمی هاتینە هەلوەشاندن ژلایێ حکومەتێڤە.
ئەو یەکژی دیارکر کو حکومەتێ ئەڤ ئەردە پێشکێشی وی کریە.
باژێرڤانییا تەناهیێ بۆ خانی نیوز وەسا دیارکر: کو بەریا چەند سالا ئەڤ 65 جۆتیارێن ل تاخێ کێڤلا هاتینە قەرەبووکرن ژلایێ حکومەتێڤە و ب هیچ رەنگەکى چ ماف ل سەر وی ئەردی نەماینە.
خانى نیوز، سهعد عاسف
