وەزیرێ پەروەردا ھەرێما کوردستانێ راگەھاند، چێدبیت کۆمبوونا سوبەھی یا لژنا بلندا رووبرووبوونا کۆرۆنایێ نەھێتە ئەنجام دان، نوکە ئەو پێشنیارێن خۆ دەربارەی دەستپێکرنا خوێندنێ دیارکرینە و دێ دانوستاندنان دگەل لژنێ کەن، ھەتا نوکە ژی وان چ بریارەک دەربارەی دەستپێکرنا پرۆسا خوێندنێ نەداینە.
ئالان حەمە سەعید، وەزیرێ پەروەردا حکومەتا ھەرێما کوردستانێ راگەھاند، ھەتا نوکە ژی وان چ بریارەک دەربارەی دەستپێکرنا پرۆسا خوێندنێ نەداینە، ب تنێ مە پێشنیارا خۆ ئامادەکرییە بۆ لژنا بلندا رووبرووبوونا کۆرۆنایێ ئەگەر سوباھی کۆمببن، بەلێ چێدبیت سوباھی دەم یێ گۆناجی نەبیت بۆ ئەندامێن لژنێ، چێدبیت ژی رۆژەک یان دوو رۆژێن دیتر کۆمبوون بھێتە ئەنجام دان، ناڤھاتی گۆت ژی: وان پێشنیارێن خۆ ژی بەرچاڤکرینە و دوماھیک جار ژی ھەلسەنگاندن دێ بۆ ھێتە کرن و بریار ژی دێ لژنە دەت، گرنگ ئەوە کو ل ٦ ڤێ ھەیڤێ یان ھەر رۆژەکا دی بھێت دێ دەوام دەستپێکەت، ب وێ میکانیزما وەزارەتا ساخلەمیێ بۆ ئەوان پێشنیار بکەت.
ئالان حەمە سەعید، بەحسێ ھندێ ژی کر، ل ھەموو حالەتەکیدا دەستپێکرنا پرۆسا خۆاندنێ وەکی بەرێ نابیت، ئانکو نابیت ناڤەندێن خواندنێ ب شێوازەکێ قەرەبالغ دەوام تێدا بھێتە کرن، ل دووڤ وێ پلانا کو ھاتییە دانان و ئەگەر بوار ھەبیت بشێن جێبەجێبکەین، ھەردوو وەرزێن خۆێندنا ئەڤ سالە دێ خوینین بێی کو کوالێتیا خواندنێ بھێتە خوارێ، بۆ ھندێ داکو ب تەمامی ھەم ژلایێ پەروەردێ و خواندنا قوتابیان زەرەرمەند نەبن.
