سەقاناسییا ھەرێما کوردستانێ راگەھاند کو پێلەکا باران بارینێ د چەند رۆژەکان دا دێ کاریگەریێ ل سەر دەڤەرێ ھەبیت و د ھندەک دەم و جھان دا باران دێ ب دژواری باریت.
پشکا پێشبینیێن رێڤەبەریا سەقاناسی و بیڤەلەرزان ل ھەرێما کوردستانێ راپۆرتا پێشبینیان بۆ کەش و ھەوایێ چەند رۆژێن داھاتی بەلاڤکرییە و راگەھاندییە: کو رۆژا ئەینی کاریگەرییا ئێکگرتنا نزمە فشارا دەریایا سۆر دێ درێژ بیت بۆ سەر دەڤەرێن مە، ل دەستپێکێ ژی ل دەڤەرێن چیایی پشکا رۆژھەلاتا ھەرێمێ و سنۆرێ پارێزگەھا سلێمانیێ و سنۆرێ پارێزگەھا کەرکووکێ و ئیدارا گەرمیان بارانا ناڤنجی دێ باریت، و پشتی زێدەبوونا کاریگەرییا ئەڤێ پێلێ ل ئێڤارییا رۆژا ئەینی دێ درێژی پێ ھێتە دان بۆ سەر ھەموو دەڤەرێن جودا یێن ھەرێمێ.
ههروهسا سەقاناسییا ھەرێما کوردستانێ گۆتییه: رۆژا شەمبی ژى کاریگەرییا ئەڤێ پێلێ دێ یا بەردەوام بیت و ئاستێ بارانێ ژی دێ یا ناڤنجی بیت، ھندەک دەڤەرێن پارێزگەھا سلێمانیێ و ئیدارا گەرمیان دێ باران ب دژواری باریت و دگەل ھاتنا ئەڤێ پێلێ گوپیتکێن بلند یێن چیایان و دەڤەرێن سنۆری دێ بەفر باریت و پلێن گەرمێ دێ نێزیکی (٤-٦) پلان نزم بیت و ل دەمێ باران بارینێ ژی عەور و بریسی دگەل دانە.
سەقاناسیێ ئاماژە ب ھندێ ژى کرییە کو رۆژا ئێکشەمبی ژی کاریگەریا ئەڤێ پێلێ ل سەر دەڤەرێن مە دێ ب دوماھیک ھێت.
