یانا دالکورد یا کوردێن سوێدێ یا پشکدار د خولێن سوێدێ دا ب فەرمی ناڤ و لۆگۆیێ خوە گوھۆری ژ دالکورد بوو براتی ئێڤ سی.
سەرکەوت عەبدوللا جونەید، سەرۆکێ یانا دالکورد (براتی) ل دۆر گوھۆرینا ناڤێ یانێ ب تایبەت بۆ خانی نیوز دیارکر، گوھۆرینا ناڤ و لۆگۆیێ یانێ ب رازیبوونا پتریا ئەندامێن دەستەیا گشتی یا یانێ ھاتیەکرن و مەرەما وان ژی ئەوە ب تنێ بوو بەرژوەندیا یانێ دبینن، ژبەرکو ناڤ و لۆگۆیێ نوو یێ یانێ دێ پتر د بەرژوەندیا یانێ دا بیت.
جونەید ئاشکرا کر، ل گۆرەی قانوونا نوو یا ئێکەتیا تەپاپێ یا ئەورۆپی و سوێدی نابیت لۆگۆیێ چ یانان گرێدای وەلاتەکی یان حزبەکێ بن، لەورا وان وەسا دیت چەند گوھۆرینا د لۆگۆیێ یانێ دا بکەن.
سەرۆکێ یانا دالکورد (براتی) سوپاسیا جەماوەرێ خوە یێ وەرزشی کر ل ھەموو جیھانێ کو ل دەمێ بووری پشتەڤان و پالپشتێن ڤێ یانێ بوون، ھیڤی ژی خواستن ب ڤێ بریارێ دلخۆش بن، ژبەرکو ناڤ و لۆگۆیێ یانێ یێ نوو ژی گرێدای کەلتورێ کوردیە، ھەر کەسێ باش ھزرا خوە تێدا بکەت ناڤێ مەرەما وان ب براتی ئانکو برایەتیێ د ناڤا کوردان دا زێدە بکەین ل ھەر جھەکێ ھەبیت، لۆگۆیێ یانێ ژی ب تمامی گرێدای کەلتورێ کوردیە کو پێکھاتی یە ژ پەزەکێ کووڤی و ھەموو دنیا باش دزانن پەزێن کووڤی ل چیایێن کوردستانێ بەرنیاسن، د گەل رەنگی کەسک و سۆر و زەر و سپی د ناڤا لۆگۆی دا یە، ل ناڤا ناڤینا لۆگۆی ھێمایێ رۆژێ یێ زەر یێ ئالایێ کوردستانێ د ناڤ دایە و ئەوان چ مەرەم ب گۆھۆرینا ناڤێ یانێ نەبوون، ب تنێ ئەو وەسا دبینن ئەڤ گۆھۆرینە دێ د بەرژوەندیا یانێ دا بیت .
خانی نیوز، ھەژار مەعرووف
