ڤاتیكان به‌رنامه‌یێ سه‌ردانا پاپا فرانسیس بۆ هه‌ولێرێ و به‌غدا رادگه‌هینیت

 ڤاتیكانێ به‌رنامه‌یێ سه‌ردانا پاپا فرانسیسى بۆ هه‌رێما كوردستانێ راگه‌هاند، كو سه‌ره‌دانیكرنا پارێزگه‌ها هه‌ڤلێرێ و ده‌ڤه‌را قه‌ره‌قووش و ده‌ڤه‌را ئوور و هه‌روه‌سا هه‌ردوو پارێزگه‌هێن به‌غدا و مووسلێ ب خۆڤه‌ دگریت.

سه‌ره‌دانا پاپایێ ڤاتیكانێ ل رۆژا پێنجى ئادارێ دێ ده‌ستپێكه‌ت هه‌تا رۆژا هه‌شتێ ئادارێ، ئانكو چوار رۆژان دێ ل هه‌رێما كوردستانێ و ئیراقێ مینیت.

بریاره‌ رۆژا ئه‌ینى پێنجێ ئادارێ، پاپایێ ڤاتیكانێ ل فرۆكخانه‌یا ناڤده‌وله‌تیا به‌غدا ژلایێ سه‌رۆك وه‌زیرێن ئیراقێ ڤه‌ پێشوازى لێ بهێته‌ كرن و دێ هه‌ر ل وێرێ ژى كۆمبوونه‌كێ كه‌ن، پاشى ل كۆشكا سه‌لام ل به‌غدا ژلایێ سه‌رۆككومارێ ئیراقێ ڤه‌ پێشوازى دێ لێ هێته‌ كرن.

پاپایێ ڤاتیكانێ رۆژا د دووڤ دا دێ سه‌ره‌دانا نه‌جه‌ف كه‌ت و دێ دگه‌ل عه‌لى سیستانى لێڤه‌گه‌رێ شیعه‌یان كۆمبیت، و ژ وێرێ دێ سه‌ره‌دانا باژێرێ شوونواریێ ئوور كه‌ت.

رۆژا ئێكشه‌مبى كو دكه‌ڤیته‌ حه‌فتێ ئادارێ دێ  سه‌ره‌دانا هه‌ولێرێ كه‌ت و ل فرۆكخانه‌یا ناڤده‌وله‌تییا هه‌ولێرێ دێ دگه‌ل به‌رپرسێن بلندێن هه‌رێما كوردستانێ و كه‌سایه‌تێن ئاینى كۆمبیت.

پاشى دێ سه‌ره‌دانا مووسلێ كه‌ت و دێ نڤێژێ بۆ قوربانیێن شه‌رى كه‌ت، و پاشى دێ چیته‌ ده‌ڤه‌را قه‌ره‌قووش و پاشى دووباره‌ دێ ڤه‌گه‌ریته‌ ڤه‌ هه‌ولێرێ.

هه‌ر ل دووڤ به‌رنامێ وى، پاپایێ ڤاتیكانێ ئێڤارییا رۆژا ئێكشه‌مبى ل یاریگه‌ها شه‌هید فه‌ره‌نسۆ حه‌ریرى دێ نڤێژێ خوینیت و رۆژا دووشه‌مبى دێ ڤه‌گه‌ریته‌ ڤه‌ به‌غدا و و ژ وێرێ ژى به‌ره‌ڤ ڤاتیكانێ ڤه‌گه‌ریت.