سائیروون: رێ نادەین نووری مالکی ببیتە سەرۆکێ وەزیران

پەرلەمانتارەکا فراکسیۆنا سائیروون د جڤاتا نوونەرێن ئیراقێ دا راگەھاند، نووری مالکی د دەمێ سەرۆکاتییا حکومەتێ دا سێکا ئیراقێ رادەستی رێکخستنا تیرۆرستییا داعشێ کر، لەورا ئەو رێ نادەن جارەکا دی ئەو ببیتە سەرۆکێ وەزیران.
مەناھل حمێداوی، ئەنداما فراکسیۆنا سائیروون یا سەر ب رەوتا سەدر ڤە ھێرشێن توند کرنە سەر نووری مالکی، سەرۆکوەزیرێن پێشتر یێ ئیراقێ و راگەھاند، دەمەکە مالکی دەست ب داخویانیێن رۆژنامەڤانی کرییە و دا رێ بۆ خوە خۆش بکەت جارەکا دی ببیتە سەرۆکێ وەزیران.
حمێداوی دوپات کر کو ئەو رێ نادەن ئەو کەسێ سێکا ئاخا ئیراقێ رادەستی داعشێ کری جارەکا دی ببیتە سەرۆکێ وەزیران.
سالا ٢٠١٤ێ ل دەمێ نووری مالکی سەرۆکوەزیرێن ئیراقێ، رێکخستنا تیرۆرستییا داعشێ سێکا ئاخا ئیراقێ داگیرکر بێی حکومەتا وی چو رێکاران بگریتە بەر و چەکێ سوپایێ ئیراقێ ھەموو کەفتە دەستێ وێ رێکخستنێ.