لیوا عەواد سورچی: شانەیێن نڤستی یێن داعشێ ل موسل ھەنە

جێگرێ فه‌رماندا نه‌ینه‌وا بۆ خانی نیوز راگه‌هاند؛ شانه‌یێن نڤستی یێن داعشێ ل مووسلێ هه‌نه‌ لێ ره‌وش كۆنترۆلكریه‌.

پشتی رزگاربونا مووسلێ ژ داعشی عەبادیێ سەرۆک وەزیرێن بەرێ یێن عیراقێ رۆژا سەرکەفتنێ لسەر داعش راگەھاند و دیارکر کو داعش ل عیراقێ ھەموویێ و بتایبەت ل موسل نەما لێ جێگرێ فرماندێ پۆلیسێن نەینەوا دبێژیت شانەیێن وان ماینە.

لیوا عەواد سورچی، جێگرێ فەرماندێ پۆلیسێن نەینەوا تایبەت بۆ خانی نیوز گۆت: ل دەردۆرێن مووسلێ شانەیێن نڤستی یێن داعشێ ماینە و ھێزێن وان ب ھەماھەنگی لگەل ھێزێن دی یێن ئێمناھیێ و سەربازی ئوپه‌راسیۆنان دكه‌ن.

لیوا عەواد د درێژیا گۆتنێن خوه‌ دا ئاماژه‌ كر، رەوش ل سەنتەرێ قەزا مووسل ل ژێر کۆنترۆلا وان دایه‌ و وه‌لاتی لگەل ھێزێن ھەوالگێریێ د ھاریکارن لێ دخوازین زێدەتربیت ئەڤ ھاریکاریە ژ بۆ ھندێ بشێین مەترسیێن داعشێ لسەر پارێزگەھێ كێمتر بكه‌ن.

جێگرێ فەرماندێ پۆلیسێن نەینەوا خویا ژی كر، ل گوندێ عێن جەحش ھەبوونا داعشێ یا زێدەبوو لێ د ئوپوراسیۆنەکا دژە تیرۆرا ئیراقێ دا ئەو شیان چەندین ئەندامێن وان دەستەسەربکەن.