سەرۆکێ ھەرێما کوردستانێ پیرۆزباھی ل عەلی باپیر کرن، ب ھەلکەفتا بداویھاتنا کارێن کۆنگرێ چارێ و ھەلبژارتنا وی وەک سەرۆکێ کۆمەلا دادگەر یا کوردستانێ. نێچیرڤان بارزانی د پەیامەکێ دا راگەھاند؛ ب ھەلکەفتا ب داویھاتنا کارێن کۆنگرێ چارێ یێ کۆمەلا دادگەر یا کوردستانێ و ھەلبژارتنا عەلی باپیر وەک سەرۆکێ وێ، پیرۆزباھیێن گەرم ل عەلی باپیر و سەرکرداتییا وان یا نوو، ئەندام و جەماوەرێ کۆمەلێ دکەم و ھیڤییا سەرکەفتنێ د کار و ئەرکێن وان دا دخوازم. سەرۆکێ ھەرێمێ دیار ژی کرییە، ھەر ب ڤێ ھەلکەفتێ دوپاتیێ ل گرنگی، تەبای و ئێکرێزییا ئالیێن سیاسی و پێکھاتەیێن ھەرێما کوردستانێ دکەین، عەلی باپیر و کۆمەلا دادگەر یا کوردستانی ژی وەک ھێزەکا سیاسی یا دیار دکارن رۆلەکێ بەرچاڤ د ڤی بواری دا ببینن و ئەو ھەموو پێکڤە ژ بۆ رووبرووبوونا ڤێ قوناغا ھەستیار و پاراستنا ماف و دەستکەفتێن دەستووری یێن گەلێ کوردستانێ و سەرکەفتن ل سەر کێشە و قەیرانان، دێ تەبا و ھەڤکاری و ھەماھەنگ بین.
