ئهڤرۆ چارشهمبی 10-3-2021 مهسرور بارزانى سهرۆكێ حكومهتا ههرێما كوردستانێ د رێورهسمهكێ دا خهلاتێ رێزگرتنێ دا چار كارمهندێن پۆلیسێ ههوڵێرێ، خهلاتكرنا وان ژى ب ئهگهرێ دلسۆزى و ماندیبوون و لێزانییا وان بوویه د بجهئینانا ئهركێن وان دا.
سهرۆكێ حكومهتا ههرێمێ د گۆتارهكێ دا د ئهوێ رێورهسمێ دا راگههاند: ئهو دهستخۆشیێ ل وان دكهت و هڤییا سهركهفتنێ ژ بۆ خزمهتكرنا كوردستانێ بۆ دخوازیت، ئاما ژى ب هندێ ژى كر ههتا كو ئهو خودانێ كهسێن دلسۆزێن وهها بن، كوردستان د دهستهكێ ئهمیندایه.
ههروهسا مهسرور بارزانى سهرۆكێ حكومهتا ههرێمێ، رێبهر ئهحمهد وهزیرێ ناڤخوه راسپارد ب پێدانا پێشخستنێ ب وان كارمهندان.
دهقێ گۆتارا سهرۆكێ حكومهتێ:
گهلهك ب خێرهاتن رێزداران
ئهڤرۆ ئهگهرێ كۆمبوونا مه ل ڤێرێ بۆ هندێ یه كو بێژمه ههوه رۆژا ئهینییا بۆرى من ڤییا سهرهدانا جههكێ حكومى بكهم كو ژ ئالییێ ڤان بهرێزانڤه زێرهڤانى لێ دهاته كرن، ترۆمبیلهكا دى ژى ل گهل من دا بوو، بێى كو ئهو بزانن ئهم كینه، مه ڤییا سهرهدانا وى جهى بكهین، ڤان رێزداران رێك ل مه گرتن و گۆتن: ل دووڤ رێنمایان چوونا ژوورڤه رێك پێ ناهێتـه دان، ههرچهنده ههڤالێن كو دگهل من دا بوون خوه پێدانه نیاسین و ناسنامهیێن خوه نیشان دان، لێ وان گۆت كو وان بهرپرسێن خوه ههنه و پێدڤییه پرسیارێ ب بهرپرسێن خوه بكهن بۆ هندێ بزانن كو دێ مۆلهت ب ههوه هێته دان بچنه ژوورڤه یان نه. ئهم نزیكى 10 خولهكان ههتا چارئێكهكى چاڤهرێ بووین، پاشان ئهم نیاسین و رێك ب مه دان كو ئهم سهرهدانا ئهڤى جهى بكهین. لهورا من ئهڤرۆ ڤییا گازى ڤان بهرێزان بكهم بۆ هندێ كو دهستخۆشیێ ل وان بكهم و سوپاسییا وان بكهم ژ بۆ دلسۆزییا وان ل ههمبهرى ئهوی ئهركێ ل سهر ملێن وان. ههتاكو ئهم ژى خوهدانێ دلسۆزێن وهكو ههوه بین، كوردستان د دهستهكێ ئهمیندایه. شانازیێ ب ههوه دكهم بۆ هندێ كو ههوه ئهركێ خوه بجهـ ئینایه و ههتا كو هوون پشت راست نهبووین كو رێنما هاتینه بجهئینان وهكو بهرپرسێن ههوه بۆ ههوه گۆتین، ههوه رێك ب مه نهدا. لهورا ئهڤرۆ بۆ نیشاندانا سوپاسى و پێزانێن خوه بۆ ههوه، د خزمهتا ههوهدامه بۆ هندێ كو سوپاسیا ههوه بكهم و ههوه خهلات بكهم. دهستخۆشیێ ل ههوه دكهم و شانازییێ ب ههوه دكهم، گهلهك گهلهك سوپاس بۆ ماندیبوون و دلسۆزییا ههوه.
