ھاتنا پاپای بۆ کوردستانێ وەکو دانانا سیستەمێ S-400 بوو

بسپورەکێ شارەزا د خواندنێن ئیسلامی دا دیارکر کو ھاتنا پاپایێ ڤاتیکانێ بۆ کوردستانێ دێ گەلەک کارتێکرنا خوە ل دەڤەرێ ھەبیت و ئێدی دێ بیتە رێگر ل ھەمبەر ھێرشێن وەلاتێن جیران بۆ سەر کوردستانێ.
د.جومعە بەندی، بسپور دخواندنێن ئیسلامی دا ل دۆر ھاتنا پاپایێ ڤاتیکانێ بۆ کوردستانێ بۆ خانی نیوز گۆت: ھاتنا پاپای بۆ کوردستانێ گەلەک وەلاتێن جیران پێ نەخۆش بووینە، ژبەرکو ئەو ھزر و بەرنامێن سەرێ وان و پرۆژێن ھەین ل سەر کوردستانێ ھەموو ھاتن تێکدان، ھاتنا پاپایێ ڤاتیکانێ بۆ کوردستانێ مینا دانانا سیستەمێ مۆشەکێن (٤٠٠-S) بوو، ژبەرکو وەلاتێن ئیران و تورکیا ھەر جارەکێ ب شێوەکی مایتێکرنێ د کوردستانێ دا دکەن، لەورا ھاتنا وی بۆ دەشتا نەینەوا و کوردستانێ و نڤێژکرنێ ھەمی پرۆژێن ھەر دو وەلاتان ‌لادان و ئەو ھێرشێن ب بەھانەیا پارتیەکا تیرۆرستی کو بناف پەکەکێ، ئەڤە ھەمی ھاتنە ژناڤبرن، ژبەر وێ یەکێ نابیت پشتی سەردانا پاپایی یا ئاشتیێ ژنوو ھێرشێن لەشکەری ل دەڤەرێ بھێنەکرن نە ل ئیراقێ و نە ل کوردستانێ.
جومعە بەندی زێدەتر گۆت: چوونا وی بۆ نک عەلی سیستانی ئیران ژی تەنگاف کرییە، ژبەرکو سیستانی ژ قوتابخانێن راستڤەکریە ژ قوتابخانێن مەزھەبێ شیعی، ھەتا یێ وەرگرتیە ژلایێ وەلاتێن کەنداڤی ژی ڤە وەک ئەرەبستانا سعوودیێ ژی.
د. جمعە بەندی ئەو ژی گۆت: دڤێت ھەرێم و بەغدا ژی پێداچوونێ و دوبارە خواندنێ بۆ ھندەک تشتان بکەن، ژبەرکو ھەرێم و بەغدا پێدڤی ب ھاریکاریا ئێکدو نە.
دەمێ چەند رۆژانە ل تۆرێن جڤاکی ھەوەکا گوھۆرینا پرۆفایلان دەست پێکریە ژلایێ وەلاتیێن کوردستانێ ڤە ل دژی داخویانیێن بەرپرسێن تورکیا ل سەر پوولەکی کو نەخشێ کوردستانێ و وێنێ پاپایێ ڤاتیکانێ ل سەر ھەیە و تورکیا دلگران کریە.

خانى نیوز، سالار محه‌مه‌د دۆسكى