عهلی دۆلهمهری، نوونهرێ حكومهتا ههرێما كوردستانێ ل فرهنسا بۆ خانی نیوز گۆت: پشتی سالا 2003 ههموو وهلاتێن رۆژئاڤا و بتایبهت فرهنسا حهزدكهن ئیراقهكا دیموكراسی، فیدرالی و فرهئالی ئاڤابكهن، لێ مخابن وهلاتهكێ نهسهقامگیره و وهلاتێن دهوروبهر ب ساناهی دهستوهردانێ تێدا دكهن، بۆیه داخوازكرنا نێچیرڤان بارزانی ژی بۆ فرهنسا پهیامهك بوو ژ بۆ كو پێكهاته و ئالیێن ئیراقی پێكڤه ئیراقهكا نوو ل سهر بنهمایێن دیموكراسی و فیدرالی ئاڤا بكهن و فرهنسا ژی د سهرهدانا نێچیرڤان بارزانی دا حهزكرییه وێ پهیامێ بدهت خهلكی.
عهلی دۆلهمهری د بهرسڤا پرسیارهكا خانی نیوز دا ل دۆر بۆچی فرهنسا ههموو گاڤان خوه ل كوردستانێ دكهته خودان گۆت: خهلكێ فرهنسا وهكی خهلكێ كوردستانێ گهلهك ئهزموون ههنه تاكو گههشتییه سهربهخۆیا خوه و بنهمایێن وان بنهمایێن ئازادی و دیموكراسیێ نه و نهبوونا دهولهتهكی و زولما ژێما بهعس دگهل كوردان، ڤیانهك د دلێ فرهنسا دا ل ههمبهر كوردان پهیداكرییه و فرهنسا پهیوهندییهكا دیرۆكی یا كهڤن د گهل سهركرداتییا سیاسییا كوردستانێ ههیه، ههروهسان سهندیكایێن نۆشدار و رۆژنامهڤانان پهیوهندیێن باش د گهل حكومهتا فرنسا چێكرینه و پاشان گههشتینه قوناغهكا دبلۆماسی و پشتی كو كوردستان د دهستوری دا بوویه پشكهك ژ ئیراقێ، فرهنسا بهردهوام پشتهڤانییا وان كرییه و تاوهكو ل سهر دهستێ سهرۆك مهسعود بارزانی كو بۆ جارا ئێكێ ل 15/6/2010 ب فهرمی سهرهدانا فرهنسا كری و ژ وێ رۆژێ بوو دۆسییهكا گرنگ و ب بایهخ ژ بهركو فرهنسا زانی كوردستان فاكتهرێ سهقامگێری و ئاشتیێ یه و پشتی سالا 2003 سهرۆك بارزانی و مام جهلال تالهبانی رۆلهكێ مهزن گێراینه.
نوونهرێ حكومهتا ههرێما كوردستانێ ل فرهنسا ل دۆر پرسیارا وێ یهكێ كو ههولێر د 3 مههێن بووری دا 2 جاران هاتییه هێرشكرن و رۆلێ فرهنسا د پاراستنا ههولێری دا گۆت: وهكی هوون دبینن دوهی وهزیرێ دهرڤه یێ فرهنسا د پهیامهكێ دا گۆت: ئهو ههموو دهما د ئامادهنه ژ بۆ پاراستنا ههرێمێ پشتهڤانییێ بكهن و ههرێما كوردستانێ بۆ فرهنسا گهلهك گرنگه و سهقامگێریا ئیراق و كوردستانێ خالهكا زۆر گرنگه تاكو بشێن ئیراقهكا ئێگرتی ئاڤابكهن و مافێن ههموو پێكهاتان بهێن پاراستن.
دۆلهمهری ل دۆر پێشبینیا پهیوندیێن داهاتی یێن ههردو ئالییان خویا كر، پهیوهندیێن فرهنسا و كوردستانێ گهلهك بهێزن د وارێن سیاسی و دبلۆماسی دا و د داهاتی ژی دا حهزدكهن گرنگیێ بدهن پهیوهندیێن ئابووری، ئهكادیمی و رهوشهنبیری د ئاستهكێ بلندتر دا و بهێزبكهن و د داهاتهكێ نزیك دا دێ كهڤن د وارێ بجهئینانێ دا لێ ژبهر رهوشا كۆرۆنا دهستپێنهكرینه.
