ناڤخوەیا ھەرێمێ و ئیراقێ: ھێرشا سەر ھەولێرێ بۆ لێدانا رێککەفتنا ھەردو ئالییانە

ھەردو وەزارەتێن ناڤخوە یێن ھەرێما کوردستانێ و ئیراقێ بەیانەکا ھەڤپشک ل دۆر ھێرشێن سەر فرۆکخانەیا ھەولێرێ بەلاڤکر و راگەھاند، ئارمانجا ھێرشان لێدانا رێککەفتنا داویێ یا د ناڤبەرا ھەرێمێ و بەغدا دایە.
وەزارەتێن ناڤخوە یێن ھەرێم و ئیراقێ د بەیانا خوەیا ھەڤپشک دا ئاشکرا کر، ئەو ھێرشێن ڤێ داویێ ل سەر ھەولێرێ و دەڤەرێ پشکەکن ژ وان ھێرشێن تیرۆرستی یێن وان رێکخستنان یێن ئاساییشا ھەرێما کوردستانێ و ئیراقێ دکەنە ئارمانج، مەرەم ژی پێ ئەوە ئاشتییا جڤاکی تێکبدەن و رەوشێ ئالۆزتر بکەن.
ھەردو وەزارەتان ئەو ھێرش شەرمزار کرن و دوپات کر، ئەو ھێرش بزاڤێن خڕشن بۆ لێدانا پێشڤەچوونێن ئەرێنی یێن د پەیوەندێن ھەولێرێ و بەغدا دا دروست بووین، ب تایبەت ل سەر ئاستێ بلندێ ھەماھەنگییا ئاساییشێ.
ھەردو وەزارەتێن ناڤخوە یێن ھەرێما کوردستانێ و ئیراقێ گۆت ژی: ھەماھەنگییا وان بۆ دابینکرنا ئاساییشا وەلاتییان و بەرھنگاربوونا تێکدانا سەقامگیریێ دێ بەردەوام بن.