سەرۆکێ حکومەتا هەرێما کوردستان، ئه‌ڤرۆ رۆژا دووشه‌مبیێ پێشوازی ل شیره‌تكارێ تایبەت و سەرۆکێ تیما ڤه‌كۆلینێن ناڤده‌وله‌تى ل تاوانێن داعش یونیتاد UNITAD کر.
مه‌سروور بارزانى و كه‌ریم ئەسەد ئەحمەد خان گاڤێن پرۆسەیا دادگه‌ها تاوانبارێن داعش و هەماهه‌نگیا ده‌ستهه‌لاتا دادوەریی و دامودەزگه‌هێن پەیوەندیدارێن حکومەتا هەرێما کوردستانێ و ئامادەکرنا پرۆژەیا قانوونێن تایبەت ب دادگه‌ها تاوانێن تایبەتمەند ب تاوانێن داعش ل هەرێما کوردستانێ گۆتوبێژکرن.
شیره‌تكارێ تایبەت و سەرۆکێ تیما یونیتاد، په‌سنا هەماهەنگیا حکومەتا هەرێمێ و پشته‌ڤانیا سەرۆکێ حکومەتێ ل کار و ئەرکێن تیما یونیتاد و سیستەمێ دادوەریێ کر و ئەزموونا هەرێما کوردستانێ د ڤى وارى دا، وەک نموونەیەکا سه‌ركه‌فتى ل ناڤچێ دیاركر.
سەرۆکێ حکومەتێ سوپاسییا شیره‌تكارێ تایبەت و سەرۆکێ تیما یونیتاد کر بۆ ده‌مێ كاركرنێ ل ئیراق و هەرێما کوردستانێ ل پێناڤ بجهئینانا دادپەروەری بۆ قۆربانێن ده‌ستێ داعش و قەرەبووکرنا کەسوکارێن وان، پیرۆزباهى لێکر ب هه‌لكه‌فتا هه‌لبژارتنا وى وەک داواکارێ گشتیی دادگه‌ها ناڤده‌وله‌تییا تاوانان و هیڤیا سه‌ركه‌فتنێ بۆ خواست د كارێ نوو دا.
